నాలాల్లో వ్యర్థాలు వేయొద్దని హైదరాబాద్ ప్రజలకు హైడ్రా కమిషనర్ విజ్ఞప్తి

హైదరాబాద్‌లో నాలాల్లో ప్లాస్టిక్, ఇతర వ్యర్థాలు వేయొద్దని హైడ్రా కమిషనర్ రంగనాథ్ ప్రజలకు విజ్ఞప్తి చేశారు. నాలాల డీసిల్టింగ్ సమయంలో భారీ స్థాయిలో ప్లాస్టిక్, చికెన్ మసాలా ప్యాకెట్లు, కేబుల్ వైర్లు వెలుగులోకి వచ్చాయని తెలిపారు.

చందానగర్‌లో ఒక కల్వర్టు కింద ఒక లారీ నిండా కేబుల్ వైర్లు లభ్యమైనట్లు వెల్లడించారు. ఇప్పటివరకు 300 లారీలకు పైగా ప్లాస్టిక్ వ్యర్థాలను తొలగించినట్లు చెప్పారు.

వర్షాకాలంలో నీరు సజావుగా ప్రవహించాలంటే ప్లాస్టిక్, ఇతర వ్యర్థాలను నాలాల్లో వేయకూడదని సూచించారు. ఈ వ్యర్థాల కారణంగా వరద నీరు రోడ్లపై నుంచి ఇళ్లలోకి చేరుతోందని వివరించారు.

చెత్త డిస్పోజల్ సరిగ్గా చేయడం చాలా ముఖ్యమని, ప్రజలు బాధ్యతగా వ్యవహరించాలని కోరారు. మనం ప్రకృతిని విధ్వంసం చేస్తే ప్రకృతి కూడా ప్రభావం చూపుతుందని హెచ్చరించారు.