అంతర్జాతీయ తెలుగు రచయిత్రుల సభల్లో భాష పరిరక్షణకు పిలుపు

విజయవాడలో మూడవ అంతర్జాతీయ తెలుగు రచయిత్రుల మహాసభలు జరిగాయి. ఈ సదస్సులో తెలుగు భాషను భావితరాలకు అందించే బాధ్యతను తల్లిదండ్రులు, రచయితలు స్వీకరించాలని వక్తలు కోరారు.

మండలి వెంకట కృష్ణరావు శత జయంతి సందర్భంగా నిర్వహించిన ఈ సభల్లో గౌరవాధ్యక్షులు మండలి బుద్ధ ప్రసాద్, రచయిత యార్లగడ్డ లక్ష్మీ ప్రసాద్ పాల్గొన్నారు. ప్రధాన వేదికకు ఎద్దనపూడి సులోచన రాణి, బండారు అచ్చమాబమ్మ పేర్లు పెట్టారు. మరో మూడు వేదికలకు ఊటుకూరు లక్ష్మీకాంతమ్మ, తెన్నేటి హేమలత, ఇల్లిందల సరస్వతీ దేవి పేర్లు పెట్టారు.

దేశంలోని పలు రాష్ట్రాలతో పాటు విదేశాల నుంచి సుమారు 600 మంది రచయిత్రులు హాజరయ్యారు. వారు తెలుగు సాహిత్యం, మహిళా రచనలపై తమ అభిప్రాయాలు పంచుకున్నారు. కవి సమ్మేళనం, బాల సాహిత్య సదస్సు, మహిళా అభ్యుదయంపై కవితా సదస్సు వంటి కార్యక్రమాలు నిర్వహించారు.

అమ్మ భాషలోని మాధుర్యాన్ని నేటి తరానికి వివరించాలని, తల్లులు చిన్నప్పటి నుంచే పిల్లలకు తెలుగు నేర్పించాలని వక్తలు సూచించారు. భాష మారితే ఆలోచనలు, అలవాట్లు మారిపోయి తల్లిదండ్రులకు పిల్లలకు మధ్య దూరం పెరుగుతుందని హెచ్చరించారు. మహిళలు సమాజంలో అన్యాయాలను ఎదిరించి హక్కుల సాధన కోసం ముందుకు రావాలని, తమ రచనల ద్వారా సమాజంలో ప్రేమ, సహనం పెంచాలని పిలుపునిచ్చారు.

రిజిస్ట్రేషన్ రుసుం చెల్లించి స్వచ్ఛందంగా పాల్గొన్న రచయిత్రులు ఎక్కువ మంది ముందుకు రావడం ఈ సభలో విశేషం. భవిష్యత్తులో ఇలాంటి సమావేశాలు మరింత మంది రచయిత్రులను ప్రోత్సహిస్తాయని నిర్వాహకులు ఆశాభావం వ్యక్తం చేశారు.