ఫార్చూన్ ఇండియా అత్యంత శక్తివంతమైన మహిళల జాబితాలో నీతా అంబానీ అగ్రస్థానం

రిలయన్స్ ఫౌండేషన్ చైర్పర్సన్ నీతా అంబానీ ఫార్చూన్ ఇండియా '2025 అత్యంత శక్తివంతమైన మహిళలు' జాబితాలో మొదటి స్థానం పొందారు. దేశవ్యాప్తంగా వ్యాపారం, ఆర్థిక, టెక్నాలజీ, ఆరోగ్యం, ప్రజా విధానాల రంగాల్లో రాణిస్తున్న 100 మంది మహిళలతో ఈ జాబితాను ఫార్చూన్ ఇండియా విడుదల చేసింది.

ముంబైలోని ఫోర్ సీజన్స్ హోటల్లో జరిగిన 16వ ఎడిషన్ అవార్డుల ప్రధానోత్సవంలో నీతా అంబానీ ఈ గౌరవాన్ని అందుకున్నారు. ఈ జాబితాలో రెండో స్థానం HCL టెక్నాలజీస్ రోష్ని నాడార్‌కు, మూడో స్థానం అపోలో హాస్పిటల్స్ నిర్వాహకురాలికి దక్కాయి.

అవార్డు స్వీకరించిన అనంతరం నీతా అంబానీ మాట్లాడారు. ఈ జాబితాలో తన కుమార్తె ఈషా అంబానీ కూడా చోటు సంపాదించడం తనకు గర్వకారణమన్నారు. 'సమానత్వం, కరుణతో కూడిన నాయకత్వం సమాజంలో వృద్ధి చెందాలి. ఆడపిల్లల విద్యపై పెట్టుబడి పెట్టడం దేశ భవిష్యత్తుకు బలమైన పునాది' అని పేర్కొన్నారు. 'కేవలం వ్యాపార లాభాలు కాదు, మనం ఎంతమంది జీవితాలను మార్చగలిగాం అనేదే నిజమైన విజయానికి కొలమానం' అని అన్నారు.