తెలంగాణలో భారీ వర్షాలు: హైదరాబాద్ సహా పలు జిల్లాలకు ఎల్లో, ఆరెంజ్ అలర్ట్

హైదరాబాద్ వాతావరణ శాఖ తెలంగాణ రాష్ట్రానికి భారీ వర్ష హెచ్చరిక జారీ చేసింది. రాబోయే కొద్ది గంటల్లో హైదరాబాద్ సహా రాష్ట్రవ్యాప్తంగా భారీ నుంచి అతిభారీ వర్షాలు కురిసే అవకాశం ఉందని తెలిపింది. ఈ నేపథ్యంలో పలు జిల్లాలకు ఎల్లో, ఆరెంజ్ అలర్ట్లు జారీ చేసింది.

గ్రేటర్ హైదరాబాద్, మేడ్చల్ మల్కాజగిరి, మహబూబాబాద్, నిజామాబాద్, రంగారెడ్డి, వరంగల్, యాదాద్రి భువనగిరి జిల్లాల్లో మోస్తరు నుంచి భారీ వర్షాలు, ఉరుములు, మెరుపులు, ఈదురుగాలులతో కూడిన వర్షాలు కురిసే అవకాశం ఉందని వాతావరణ శాఖ స్పష్టం చేసింది. వర్షం సమయంలో గంటకు 60 కిలోమీటర్ల వేగంతో ఈదురుగాలు వీచే అవకాశం ఉందని హెచ్చరించింది. ప్రజలు అప్రమత్తంగా ఉండాలని, కరెంట్ స్తంభాలు, భారీ వృక్షాలకు దూరంగా ఉండాలని సూచించింది.

నిన్న కూడా రాష్ట్రంలోని పలు ప్రాంతాల్లో భారీ వర్షం కురిసింది. హైదరాబాద్ నగరంలో రాజేంద్రనగర్ సర్కిల్‌లో 80 మిల్లీమీటర్ల వర్షపాతం నమోదైంది. జూబ్లీ హిల్స్, బంజారా హిల్స్, మియాపూర్ తదితర ప్రాంతాలు జలమయమయ్యాయి. భారీ ట్రాఫిక్ జామ్ ఏర్పడింది. శంషాబాద్ విమానాశ్రయంలో వాతావరణం అనుకూలించకపోవడంతో ఢిల్లీ నుంచి వస్తున్న సీఎం రేవంత్ రెడ్డి విమానాన్ని బెంగళూరుకు మళ్లించారు.

వాతావరణ శాఖ ప్రకారం ఈ పరిస్థితి మరో 2-3 రోజులు కొనసాగే అవకాశం ఉంది. రాష్ట్రంలో దక్షిణ తెలంగాణ జిల్లాల్లో ఎక్కువ వర్షాలు కురిస్తుండగా, ఉత్తర తెలంగాణ జిల్లాలకు ఇంకా సరిపడా వర్షాలు రాలేదు. రైతులు పత్తి విత్తనాలు విత్తినందున వర్షాల కోసం ఎదురు చూస్తున్నారు.