ఉత్తర తెలంగాణకు IMD రెడ్ అలర్ట్ – నాలుగు జిల్లాల్లో అతిభారీ వర్షం అవకాశం

హైదరాబాద్ వాతావరణ కేంద్రం ఉత్తర తెలంగాణలోని నాలుగు జిల్లాలకు రెడ్ అలర్ట్ జారీ చేసింది. ఆదిలాబాద్, నిర్మల్, ఆసిఫాబాద్ (కుమరంభీం), జగిత్యాల జిల్లాల్లో అతిభారీ వర్షం కురిసే అవకాశం ఉందని అధికారులు తెలిపారు.

ఈ జిల్లాల్లో 20 సెంటీమీటర్ల వరకు వర్షపాతం నమోదు కావచ్చని IMD అధికారి శ్రీనివాస్ చెప్పారు. గత రెండు రోజులుగా ఇప్పటికే భారీ వర్షాలు కురుస్తున్నాయి. వాగులు, వంకలు పొంగి ప్రవహించే ప్రమాదం ఉన్నందున ప్రజలు అప్రమత్తంగా ఉండాలని సూచించారు.

ఈశాన్య తెలంగాణలోని ఎనిమిది జిల్లాలకు ఆరెంజ్ అలర్ట్ జారీ అయింది. నిజామాబాద్, కామారెడ్డి, సిరిసిల్ల, మంచిర్యాల, పెద్దపల్లి, కరీంనగర్, ములుగు, భూపాలపల్లి జిల్లాల్లో 12 నుంచి 19 సెంటీమీటర్ల వరకు వర్షం పడే అవకాశం ఉంది.

మిగతా జిల్లాలైన మహబూబాబాద్, వరంగల్, వికారాబాద్, రంగారెడ్డి, హైదరాబాద్, మేడ్చల్ మల్కాజిగిరిలకు ఎల్లో అలర్ట్ ఇచ్చారు. హైదరాబాద్ నగరంలో మోస్తరు వర్షాలు కురిసే అవకాశం ఉంది. ఒకటి రెండు ప్రాంతాల్లో భారీ వర్షం నమోదు కావచ్చు.

ఇటీవలి వర్షాలతో రాష్ట్రంలో వర్షపాతం లోటు 33 శాతం నుంచి 10 శాతానికి తగ్గింది. నాలుగైదు జిల్లాలు సాధారణం కంటే ఎక్కువ వర్షపాతం పొందాయి. ఇంకా 13 జిల్లాలు లోటులో ఉన్నాయి. ప్రజలు అప్రమత్తంగా ఉండాలని అధికారులు మరోసారి హెచ్చరించారు.