తెలంగాణలో నాలుగు రోజుల పాటు భారీ వర్ష సూచన: ఐఎండీ

రాబోయే నాలుగు రోజుల్లో తెలంగాణ వ్యాప్తంగా మోస్తరు నుంచి భారీ వర్షాలు కురిసే అవకాశం ఉందని ఐఎండీ హెచ్చరించింది. గంటకు 40 నుంచి 60 కిలోమీటర్ల వేగంతో ఈదురుగాలులు వీచే అవకాశం ఉంది.

నేడు ఆదిలాబాద్, ఆసిఫాబాద్, మంచిర్యాల, నిర్మల్, నిజామాబాద్, మెదక్, కామారెడ్డి జిల్లాలకు ఎల్లో అలర్ట్ జారీ చేసింది. కొన్ని చోట్ల భారీ వర్షాలు, మిగిలిన ప్రాంతాల్లో మోస్తరు వర్షాలు పడే అవకాశం ఉంది.

నైరుతి ఋతుపవనాలు తెలంగాణలోకి ప్రవేశించాయి. అరేబియా సముద్రంలో ఏర్పడిన ఉపరితల ఆవర్తనం ప్రభావంతో వర్షం తీవ్రత పెరిగింది. ఈ నెల 28 వరకు పలు జిల్లాల్లో ఆరెంజ్, ఎల్లో అలర్ట్లు కొనసాగుతాయి.

ఉత్తర తెలంగాణ జిల్లాలతో పాటు జగిత్యాల, జయశంకర్ భూపాలపల్లి, కరీంనగర్, ములుగు, పెద్దపల్లి, వరంగల్, హనుమకొండ జిల్లాల్లో తేలికపాటి నుంచి మోస్తరు వర్షాలు కురిసే అవకాశం ఉంది. రేపు ఆదిలాబాద్, వరంగల్, హనుమకొండ ప్రాంతాల్లో భారీ వర్ష సూచన ఉంది.

హైదరాబాద్‌లో మేఘావృతమైన వాతావరణం నెలకొని ఉంటుంది. సాయంత్రం తేలికపాటి జల్లులు పడే అవకాశం ఉంది. ఉరుములు, మెరుపులతో కూడిన ఈదురుగాలులు వీచే అవకాశం ఉన్నందున ప్రజలు అప్రమత్తంగా ఉండాలని అధికారులు హెచ్చరించారు.