పాకిస్తాన్‌ను మళ్లీ FATF గ్రే లిస్ట్‌లో చేర్చేందుకు భారత్ సిద్ధం: కొత్త వీడియో ఆధారాలు

అక్టోబర్‌లో జరగనున్న FATF (ఫైనాన్షియల్ యాక్షన్ టాస్క్ ఫోర్స్) సమావేశంలో పాకిస్తాన్‌ను మళ్లీ గ్రే లిస్ట్‌లో చేర్చే ప్రయత్నంలో కొత్త వీడియో ఆధారాలను భారత్ సమర్పించనుంది. టైమ్స్ ఆఫ్ ఇండియా నివేదిక ప్రకారం ఈ విషయం తెలిసింది.

ఇటీవల జరిగిన ఆపరేషన్ సింధూర్ అనంతరం సేకరించిన కీలక ఆధారాలను భారత్ FATF కి అందించనుంది. హతమైన ఉగ్రవాదుల అంత్యక్రియల్లో అమెరికా నిషేధించిన ఒక మోస్ట్ వాంటెడ్ ఉగ్రవాద నేత స్వయంగా ప్రార్థనలు చేసిన వీడియో ఈ సాక్ష్యంలో ఉంది. ఆ కార్యక్రమంలో పాక్ ఆర్మీ సీనియర్ అధికారులు కూడా పాల్గొనడం కెమెరాలకు చిక్కింది.

పాకిస్తాన్ సైన్యం, ఉగ్రవాద గ్రూపుల మధ్య సంబంధం ఇప్పటికీ కొనసాగుతోందని రుజువు చేయడానికి ఈ వీడియోలను భారత్ ఉపయోగించుకోనుంది. 2023 ఏప్రిల్‌లో జమ్మూ కాశ్మీర్‌లోని పహల్గామ్‌లో 26 మంది పౌరులు మరణించిన ఉగ్రవాద దాడిని పాక్ సపోర్టెడ్ టెర్రరిజానికి తాజా ఉదాహరణగా భారత్ పేర్కొంటోంది.

ఇదిలా ఉండగా, FATF ఉపాధ్యక్షుడిగా భారత అధికారి వివేక్ అగర్వాల్ ఇటీవల నియమితులవడం భారత్‌కు అనుకూలంగా మారింది. 2022 అక్టోబర్‌లో పాకిస్తాన్ 34 పాయింట్ల యాక్షన్ ప్లాన్ పూర్తిచేసి గ్రే లిస్ట్ నుంచి బయటపడింది. ఉగ్రవాద నియంత్రణలో మళ్లీ వైఫల్యం చూపిస్తే తిరిగి ఆ జాబితాలో చేరే ప్రమాదం ఉంటుంది.

ఒక దేశం FATF గ్రే లిస్ట్‌లో ఉంటే, IMF, ప్రపంచ బ్యాంకు వంటి అంతర్జాతీయ సంస్థల నుంచి రుణాలు పొందడం కష్టమవుతుంది. ఇప్పటికే ఆర్థిక సంక్షోభంతో అల్లాడుతున్న పాకిస్తాన్‌కు ఇది మరింత తీవ్రమైన దెబ్బ కాగలదు.