భారత్-అమెరికా వాణిజ్య ఒప్పందం తుది దశకు చేరువలో ఉంది: అమెరికా అధికారి

భారత్‌తో ద్వైపాక్షిక వాణిజ్య ఒప్పందం కుదుర్చుకోవడానికి అమెరికా సన్నద్ధమవుతోంది. ఒప్పంద చర్చలు చివరి దశకు చేరుకున్నట్లు అమెరికా విదేశాంగ శాఖలోని ఒక అధికారి వెల్లడించారు. ఇరు దేశాలకు ప్రయోజనం కలిగించేలా ఈ ఒప్పందం ఉంటుందని ఆ అధికారి తెలిపారు. ఎన్ని సమావేశాలు జరిగాయనే దానికంటే తుది ఫలితమే ముఖ్యమని స్పష్టం చేశారు.

ఇటీవల భారత్ సవరించిన అణుశక్తి చట్టం (శాంతి చట్టం) ద్వారా పౌర అణురంగ సహకారానికి మార్గం సుగమమైందని ఆ అధికారి వివరించారు. ఇరు దేశాల మధ్య ఆర్థిక సంబంధాలు బలపడుతున్నాయనడానికి ఇటీవల జరిగిన సెలెక్ట్‌యూఎస్ఏ పెట్టుబడుల సదస్సు నిదర్శనంగా చెప్పారు. అలాగే, అమెరికాలో ప్రస్తుతం సుమారు 3.3 లక్షల మంది భారతీయ విద్యార్థులు ఉన్నారని, వారి ద్వారా తమ ఆర్థిక వ్యవస్థకు 14 బిలియన్ డాలర్లు సమకూరుతున్నట్లు వివరించారు.

ప్రతిపాదిత వాణిజ్య ఒప్పందంపై చర్చల కోసం అమెరికా వాణిజ్య ప్రతినిధి జేమిసన్ గ్రీల్ ప్రస్తుతం భారత్లో పర్యటిస్తున్నారు. కేంద్ర వాణిజ్య, పరిశ్రమల శాఖ మంత్రి పియూష్ గోయల్‌తో ఆయన మొదటి విడత చర్చలు పూర్తి చేశారు.

ఇదిలా ఉండగా, అమెరికా అధ్యక్షుడు డొనాల్డ్ ట్రంప్ వివిధ దేశాల దిగుమతులపై విధించిన 10 శాతం సుంకం, వచ్చే నెల 24 నుంచి అమల్లోకి రానుంది. ఈ గడువు లోపు ఇరు దేశాలు మధ్యంతర వాణిజ్య ఒప్పందాన్ని కుదుర్చుకోవాలని ప్రయత్నిస్తున్నాయి.