యాదాద్రి ఆలయ సమీపంలోని రాయగిరి చెరువులోకి పారిశ్రామిక వ్యర్థాలు: స్థానికుల ఆందోళన

యాదాద్రి లక్ష్మీనరసింహస్వామి ఆలయానికి సమీపంలో ఉన్న రాయగిరి చెరువులోకి ఓ పరిశ్రమ వ్యర్థ జలాలను నేరుగా వదులుతున్నట్టు బయటపడింది. ఆలయ అభివృద్ధిలో భాగంగా సుందరీకరించిన ఈ చెరువు యాదాద్రి రైల్వే స్టేషన్ దగ్గర ఉంది.

వేప నూనె, వేపపిండి వంటి వాటిని తయారు చేసే ఈ పరిశ్రమ, సేంద్రియ పురుగుమందుల తయారీకి ముడి పదార్థాలను ఉత్పత్తి చేస్తుంది. రైల్వే శాఖ ఆధ్వర్యంలో యాదాద్రి ఎంఎంటిఎస్ ఫేస్ట్ విస్తరణ పనులు జరుగుతున్న సమయంలో, రహస్యంగా వేసిన పైప్‌లైన్ ద్వారా ఈ వ్యర్థాలను చెరువులోకి వదిలే అనుసంధానం కనుగొన్నారు.

రైల్వే పనులకు అడ్డుగా వచ్చిన నీటి ప్రవాహాన్ని మూసివేయడంతో, వ్యర్థ నీరు వంతెన కింద నిల్వ ఉండిపోయింది. దీంతో తీవ్రమైన దుర్వాసన వెలువడుతోందని, కళ్ళ మంట, ముక్కు ఇబ్బందులు ఎదుర్కొంటున్నామని స్థానికులు, రైల్వే కార్మికులు చెప్పారు. చెరువు నీరు కలుషితమైన కారణంగా మేకలు, గొర్రెలు నీరు తాగడం లేదని కాపరులు తెలిపారు.

ఈ చెరువు ఆయకట్టు కింద దాదాపు 400 ఎకరాల వ్యవసాయ భూమి ఉండగా, 50 మంది రైతులు 100 ఎకరాల్లో పంటలు సాగు చేస్తున్నారు. కలుషిత నీరు భూగర్భంలో ఇంకడంతో బోరు నీరు కూడా కలుషితమైందని, ఫలితంగా వరి పంట దిగుబడి తగ్గి, తాలు నూక శాతం పెరిగిందని రైతులు పేర్కొంటున్నారు. గడ్డి కూడా ఎండిపోవడంతో పశువులకు, గొర్రెలకు మేత కూడా దొరకడం లేదని స్థానికులు ఆవేదన వ్యక్తం చేశారు.

యాదాద్రి ఆలయ అభివృద్ధి సంస్థ (YTDA) ఆధ్వర్యంలో చెరువు దగ్గర శిల్పారామం, బోటింగ్ సౌకర్యం ఏర్పాటు చేశారు. అయితే దుర్గంధం కారణంగా పర్యాటకులు, యాత్రికులు బోటింగ్ చేయడం మానేశారని, విహార స్థలాలకు వచ్చే వారి సంఖ్య గణనీయంగా తగ్గిందని స్థానిక వర్గాలు చెబుతున్నాయి. కోట్ల రూపాయలతో నిర్మించిన ఈ సౌకర్యాలు నిరుపయోగంగా మారే పరిస్థితి ఏర్పడిందని వారు విచారం వ్యక్తం చేస్తున్నారు.

ఈ అంశంపై కాలుష్య నియంత్రణ మండలి (PCB) అధికారులు స్పందించారు. తమకు ఇప్పటివరకు ఎవరూ అధికారిక ఫిర్యాదు చేయలేదని, అయితే నిబంధనల ప్రకారం పరిశ్రమ ఎఫ్లూయెంట్ ట్రీట్మెంట్ ప్లాంట్ (ETP) ఏర్పాటు చేసుకోవలసి ఉంటుందని తెలిపారు. త్వరలోనే క్షేత్రస్థాయిలో తనిఖీ నిర్వహించి, తగిన చర్యలు తీసుకుంటామని హామీ ఇచ్చారు. ఇదిలా ఉండగా, వ్యర్థాలను శుద్ధి లేకుండా చెరువులోకి వదులుతున్నట్టు తెలుస్తోంది.