ఒమన్ సముద్రంలో అమెరికా సైనిక నౌకపై ఇరాన్ దాడి

ఒమన్ సముద్రంలో ఒక అమెరికా సైనిక నౌకపై ఇరాన్ దాడి చేసింది. ఆ నౌకలో కమాండ్ అండ్ కంట్రోల్ సెంటర్ ఉన్నట్లు ఇరాన్ వార్తా సంస్థ తస్లీమ్ తెలిపింది.

ఇరాన్ ప్రాదేశిక జలాల వైపు ఆ నౌక రావడంతో దాడి చేసినట్లు ఇరాన్ చెప్పింది. గతంలో అమెరికా ఇరాన్ వాణిజ్య నౌకలపై చేసిన దాడులు, హార్ముజ్ జలసంధి నిబంధనల ఉల్లంఘనలకు నిరసనగానే ఈ చర్య తీసుకున్నట్లు తెలిపింది.

ఈ నేపథ్యంలో మధ్యప్రాచ్యంలో యుద్ధాన్ని ముగించేందుకు అమెరికాతో సంప్రదింపులు కొనసాగుతున్నాయని ఇరాన్ విదేశాంగ మంత్రి అబ్బాస్ అరాగ్షి తెలిపారు. అయితే చర్చల్లో స్పష్టమైన పురోగతి లేదన్నారు. ఇరాన్ తన హక్కులను కాపాడుకోవడంతో పాటు లెబనాన్లో యుద్ధాన్ని ముగించాలనే డిమాండ్ను తిరిగి చెప్పారు.