OPEC కోటా వివాదం: ఇరాక్ సభ్యత్వం వీడుతామని హెచ్చరిక

ప్రపంచ చమురు ఎగుమతి దేశాల కూటమి OPECలో అంతర్గత విభేదాలు తీవ్రమయ్యాయి. చమురు ఉత్పత్తి కోటాల నిర్ణయంలో సౌదీ అరేబియా ఏకపక్షంగా వ్యవహరిస్తోందని ఇరాక్ అసంతృప్తి వ్యక్తం చేసింది. తమ ఆర్థిక అవసరాలకు అనుగుణంగా కోటా పెంచకపోతే OPEC నుంచి వైదొలగుతామని ఇరాక్ ఉన్నతాధికారులు హెచ్చరించారు.

ఇరాక్ ప్రస్తుతం రోజుకు సుమారు 40 లక్షల బ్యారెళ్ల (barrels) ముడి చమురును ఉత్పత్తి చేస్తోంది. దశాబ్దాల యుద్ధాలు, అంతర్జాతీయ ఆంక్షలు, అంతర్గత అస్థిరత కారణంగా ఆ దేశ ఆర్థిక వ్యవస్థ దెబ్బతింది. పునర్నిర్మాణానికి, ప్రజల అవసరాలకు నిధులు సమకూర్చుకునేందుకు చమురు ఉత్పత్తిని రోజుకు 70 లక్షల బ్యారెళ్లకు పెంచాలని ఇరాక్ లక్ష్యంగా పెట్టుకుంది. ఈ లక్ష్యం కోసం OPECలో ఉత్పత్తి కోటా పెంపు అవసరమని ఆ దేశం వాదిస్తోంది.

OPEC నియమాల ప్రకారం సభ్య దేశాల ఏకాభిప్రాయంతో నిర్ణయాలు తీసుకోవాలి. అయితే, అంతర్జాతీయ మార్కెట్లో తన పట్టును కొనసాగించేందుకు సౌదీ అరేబియా ఇతర దేశాల ఉత్పత్తిని నియంత్రిస్తోందని, సౌదీ నిర్ణయాలే తుది అవుతున్నాయని సభ్య దేశాలు ఆరోపిస్తున్నాయి. ఈ నేపథ్యంలో, యూఏఈ కూడా OPEC సభ్యత్వం వదులుకోవాలని నిర్ణయించింది. మే 1వ తేదీ నుంచి అది కూటమి నుంచి నిష్క్రమించనుంది.

ప్రస్తుతం OPECలో సౌదీ అరేబియా, ఇరాక్, ఇరాన్, కువైట్, వెనుజులా తదితర 11 దేశాలు ఉన్నాయి. యూఏఈ తర్వాత ఇరాక్ కూడా వైదొలగితే ఈ కూటమి మరింత బలహీనపడే అవకాశం ఉంది. ఇరాక్ స్వతంత్రంగా ఉత్పత్తిని 70 లక్షల బ్యారెళ్లకు పెంచితే ప్రపంచ మార్కెట్లో చమురు సరఫరా భారీగా పెరిగి ముడి చమురు ధరలు పతనం కావచ్చని విశ్లేషకులు అంచనా వేస్తున్నారు.