జైల్లో 30 రోజులు ఉంటే ఎంపీ, ఎమ్మెల్యే సీట్లు రద్దు చేసే బిల్లు త్వరలోనే పార్లమెంట్ ముందుకు

ఎంపీ, ఎమ్మెల్యేలు క్రిమినల్ కేసుల్లో అరెస్టై 30 రోజులు జైల్లో ఉంటే వారి స్థానాలు రద్దు చేసే బిల్లు త్వరలో పార్లమెంట్ ముందుకు రానుంది. గతంలో ప్రవేశపెట్టిన ఈ బిల్లును ప్రతిపక్షాల డిమాండ్ మేరకు ప్రత్యేక కమిటీకి పంపారు.

ఈ కమిటీ తన నివేదికను 20వ తేదీ నాటికి ఇవ్వనుందని, ఆ తర్వాత కీలక మార్పులతో బిల్లు ఆమోదం కోసం లోక్‌సభ ముందుకు రానుందని వర్గాలు తెలిపాయి. ప్రస్తుతం బీజేపీకి లోక్‌సభలో 293 మంది సభ్యుల బలం మాత్రమే ఉన్నందున, ఈ బిల్లు ఆమోదానికి ఇతర పార్టీల మద్దతు అవసరం.

బిల్లు అమలుపై భిన్నాభిప్రాయాలు వ్యక్తమవుతున్నాయి. కేంద్ర ప్రభుత్వం ఈ నిబంధన అన్ని పార్టీల నేతలకూ సమానంగా వర్తిస్తుందని, అవినీతి నిరోధానికి ఇది అవసరమని పేర్కొంటోంది. మరోవైపు విపక్షాలు ఈ బిల్లుతో నకిలీ కేసులు పెట్టి, ఈడీ, సీబీఐ వంటి ఏజెన్సీలతో ప్రత్యర్థులను లక్ష్యంగా చేసుకునే అవకాశముందని ఆందోళన వ్యక్తం చేస్తున్నాయి. టీఎంసీ, శివసేన (యూబీటీ) సహా పలు పార్టీలు ఈ వాదనను బలంగా వినిపిస్తున్నాయి.

పార్లమెంట్ సమావేశాలు పునఃప్రారంభం కానుండగా, రాబోయే రోజుల్లో కమిటీ నివేదిక, దానిపై చర్చా కీలకంగా మారనున్నాయి.