పాకిస్తాన్‌లోని బహవల్పూర్‌లో జైషే మహమ్మద్ స్థావరం పునర్నిర్మాణం

పాకిస్తాన్‌లోని బహవల్పూర్‌లో ఉన్న జైషే మహమ్మద్ ఉగ్రవాద సంస్థ ప్రధాన కార్యాలయం పునర్నిర్మించినట్లు నిఘా వర్గాల సమాచారం ప్రకారం తెలుస్తోంది. 2025 మే 7న ఆపరేషన్ సింధూర్‌లో ఈ స్థావరం ధ్వంసమైంది. 15 నెలల తర్వాత ఇది పాత రూపానికి చేరుకుంది.

ఈ ఏడాది ఆరంభంలో పునర్నిర్మాణ పనులు మొదలుపెట్టారు. మర్కజ్ సుభానల్లా సెంట్రల్ హాల్‌కు కొత్త మార్బుల్ ఫ్లోరింగ్, పెయింటింగ్ చేసి వినియోగంలోకి తెచ్చారు. పాకిస్తాన్ ప్రభుత్వం, ఐఎస్ఐ కలిసి ఈ పునర్నిర్మాణానికి 25 కోట్ల నిధులు విడుదల చేసినట్లు నిఘా వర్గాలు గుర్తించాయి. అందులో 11 కోట్లు సెంట్రల్ హాల్ కోసం ఖర్చు చేశారు.

బహవల్పూర్ స్థావరం జాతీయ రహదారికి సమీపంలో ఉంది. ఇది పాకిస్తాన్ 31వ కాప్స్ మిలిటరీ కంటోన్మెంట్‌కు చాలా దగ్గరగా ఉంది. పాక్ సైన్యం, ఐఎస్ఐ మద్దతుతో ఈ ఉగ్రవాద కేంద్రం మళ్లీ కార్యకలాపాలు ప్రారంభించినట్లు నిఘా వర్గాలు చెబుతున్నాయి. ఆపరేషన్ సింధూర్ సమయంలో జైషే మహమ్మద్ చీఫ్ మసూద్ అజార్ కుటుంబ సభ్యులు, పలువురు ఉగ్రవాదులు మరణించారు.

ప్రస్తుతం ఈ కేంద్రం నుంచి ఉగ్రవాద నియామకాలు, మదరసాల నిర్మాణం, ఇతర కార్యకలాపాలు మళ్లీ ఊపందుకున్నాయి. పాకిస్తాన్ ఉగ్రవాదాన్ని అడ్డుకుంటున్నట్లు చెబుతూనే, బహవల్పూర్‌లో ఉగ్రవాదులకు ఆశ్రయం కల్పిస్తున్నదని వివిధ వర్గాలు ఆందోళన వ్యక్తం చేస్తున్నాయి.