రెస్టారెంట్ సర్వీస్ ఛార్జీ వివాదం: Rs 151 ఛార్జీపై వినియోగదారునికి Rs 15,000 పరిహారం

జలంధర్‌కు చెందిన న్యాయవాది సంజీవ్ దుగ్గల్‌కు రెస్టారెంట్ విధించిన సర్వీస్ ఛార్జీ విషయంలో వినియోగదారుల కమిషన్ రూ.15,000 పరిహారం మంజూరు చేసింది.

2023 నవంబర్ 8న సంజీవ్ దుగ్గల్ తన కుటుంబంతో జలంధర్‌లోని ఓ రెస్టారెంట్‌కు వెళ్లారు. ముగ్గురు పెద్దలు, ఒక చిన్నారికి బదులు నలుగురు పెద్దలుగా లెక్కవేసి బిల్లు చేశారు. దానిపైన రూ.151.53 సర్వీస్ ఛార్జీ కూడా చేర్చారు. ఈ విషయంపై అభ్యంతరం చెప్పినా సిబ్బంది నుంచి సరైన స్పందన రాలేదు.

దీంతో ఆయన వినియోగదారుల కమిషన్‌లో ఫిర్యాదు చేశారు. సర్వీస్ ఛార్జీ రీఫండ్, మానసిక వేదన, న్యాయ ఖర్చుల కింద రూ.5 లక్షలు డిమాండ్ చేశారు. రెస్టారెంట్ మాత్రం అది స్టాఫ్ కంట్రిబ్యూషన్ అని, మెనూలో ముందే తెలిపామని వాదించింది. అయితే బిల్లులో స్పష్టంగా సర్వీస్ ఛార్జీ అని ముద్రించడం, కస్టమర్ సమ్మతి లేకుండా వసూలు చేసినట్లు రుజువు చేయలేకపోవడంతో కమిషన్ రెస్టారెంట్ వాదనను తోసిపుచ్చింది.

కస్టమర్ అనుమతి లేని సర్వీస్ ఛార్జీ అన్యాయమైన వ్యాపార పద్ధతి అని, ఇది వినియోగదారుల హక్కులకు విరుద్ధమని కమిషన్ స్పష్టం చేసింది. రెస్టారెంట్ రూ.15,000 పరిహారం చెల్లించాలని ఆదేశించింది. ఈ కేసుకు ముందే ఆయన హోటల్ యాజమాన్యం నుంచి రూ.1,000 తిరిగి పొందారు.