SPB ఇచ్చిన టాబ్లెట్ వల్ల ఊపిరాడక కష్టమైనా 'సామజవరగమన' పూర్తి చేసిన జానకి

ప్లేబ్యాక్ సింగర్ జానకి 'సామజవరగమన' పాట రికార్డింగ్ సమయంలో జరిగిన ఒక బాధాకరమైన సంఘటనను ఇటీవల గుర్తుచేసుకున్నారు. ఎస్పీ బాలసుబ్రహ్మణ్యం తనకు ఇచ్చిన ఒక టాబ్లెట్ తీసుకున్న తర్వాత తీవ్రమైన అలర్జీ వల్ల ఊపిరాడకుండా పోయిందని, అయినా ఆ పాటను ఎంతో కష్టపడి పూర్తి చేశానని చెప్పారు.

ఆరోజు రిహార్సల్ చేస్తున్నప్పుడు తనకు కడుపులో నొప్పి రావడంతో, బాలసుబ్రహ్మణ్యం ‘బెరాలు గని’ అనే టాబ్లెట్ ఇచ్చారని జానకి వివరించారు. మందుల పట్ల అలర్జీ ఉన్నందున తాను ముందుగా వద్దన్నా, ఆయన బలవంతం మీద తీసుకున్నానని చెప్పారు. తీసుకున్న రెండు నిమిషాల్లోనే కళ్ళు ఉబ్బిపోవడం, గుండె ఎగిరిపోవడం, ఊపిరాడకపోవడం మొదలైందని, అయినా ఎలాగోలా రెండు టేకులు పాడి ముగించానని తెలిపారు.

ఆ సమయంలో భర్త బయటకు వెళ్లారు కాబట్టి ఆయన రాగానే తన పరిస్థితి చూసి కోపగించుకుని వెంటనే డాక్టర్ దగ్గరకు తీసుకెళ్లారని, అక్కడ ఇంజెక్షన్లు ఇచ్చాక నెమ్మదిగా కోలుకున్నానని జానకి చెప్పారు. అంతేకాక, పాత రికార్డులు తుడుస్తున్నప్పుడు దుమ్ము వల్ల తీవ్రమైన ఆయాసం మొదలై, దాదాపు 45 ఏళ్లుగా తనకు శ్వాస సంబంధ సమస్య కొనసాగుతోందని వెల్లడించారు.