ధవళేశ్వరం కాటన్ బ్యారేజీకి రూ.153 కోట్లతో కొత్త గేట్ల పనులు: సీఎం చంద్రబాబు ప్రారంభం

ధవళేశ్వరం కాటన్ బ్యారేజీలో 117 పాత వరద గేట్లను మార్చి కొత్తవి అమర్చే పనులు సోమవారం (జూలై 13) ప్రారంభం కానున్నాయి. ముఖ్యమంత్రి చంద్రబాబు నాయుడు ఈ పనులను ప్రారంభిస్తారు.

ఈ ప్రాజెక్టుకు రాష్ట్ర ప్రభుత్వం 152.95 కోట్లు మంజూరు చేసింది. పాత గేట్లు లీకేజీలకు గురవుతూ ఉండడంతో వాటి స్థానంలో కొత్త గేట్లను ఏర్పాటు చేయాలని కేంద్ర జల సంఘం సిఫారసు చేసింది.

గతంలో ఈ సిఫారసు అమలు కాలేదు. ప్రస్తుత ప్రభుత్వం దీనిని ప్రాధాన్యతగా చేపట్టి, నిధులు కేటాయించింది. 1980లో ఆధునీకరించిన ఈ బ్యారేజీకి 2014లో కొంత పనులు జరిగినప్పటికీ, పూర్తిస్థాయి ఆధునీకరణ ఇప్పుడే జరుగుతోంది.

ముఖ్యమంత్రి జూలై 13 ఉదయం ఉండవల నుంచి బయలుదేరి వేమగిరి మీదుగా కాటన్ బ్యారేజీ చేరుకుంటారు. కొత్త గేట్ల ఏర్పాటు పనులు ప్రారంభించిన అనంతరం, ఆత్రేయపురం మండలం పిచ్చుకల్లంకలో రైతులతో ముఖాముఖి నిర్వహిస్తారు.

అనంతరం మధ్యాహ్నం పోలవరం ప్రాజెక్టు వద్దకు చేరుకుని, ప్రధాన డ్యాం విద్యుత్ కేంద్రం నిర్మాణ పనులను పరిశీలిస్తారు. అధికారులతో సమీక్ష నిర్వహించి, ప్రాజెక్టు పురోగతిపై చర్చించనున్నారు.