తెలంగాణలో చేరికలపై జనసేన ప్రత్యేక దృష్టి: ప్రత్యేక డెస్క్, కమిటీ ఏర్పాటు

ఆంధ్రప్రదేశ్ డిప్యూటీ ముఖ్యమంత్రి, జనసేన అధినేత పవన్ కళ్యాణ్ తెలంగాణలో పార్టీని బలోపేతం చేసే ప్రయత్నాలు ముమ్మరం చేశారు. ఇందుకోసం ఓ కమిటీని నియమించారు. పార్టీ కార్యాలయంలో చేరికల నిర్వహణకు ప్రత్యేక డెస్క్ ఏర్పాటు చేశారు.

ఈ కమిటీ ఇప్పటికే సంప్రదింపులు ప్రారంభించింది. రాజకీయాలపై ఆసక్తి ఉన్న వివిధ వర్గాలతో చర్చలు జరుపుతోంది. తెలంగాణలో అన్ని స్థాయిల్లో పార్టీని బలోపేతం చేయాలన్న లక్ష్యంతో ఈ చర్యలు చేపట్టారు. తెలంగాణలో చురుగ్గా రాజకీయాలు చేస్తామని ఇటీవల పవన్ కళ్యాణ్ ప్రకటించారు.

జనసేన తెలంగాణ చరిత్రలో గతంలో పెద్దగా పోటీ చేయలేదు. 2014లో పార్టీ స్థాపించినా ఆ ఎన్నికల్లో పోటీ చేయకుండా టీడీపీ-బీజేపీ కూటమికి మద్దతు ఇచ్చారు. 2018 అసెంబ్లీ ఎన్నికల్లో పవన్ మౌనంగా ఉన్నారు. 2023 ఎన్నికల్లో బీజేపీతో కలిసి పోటీ చేసినా ఒక్క సీటు కూడా గెలుచుకోలేదు. స్థానిక సంస్థల ఎన్నికల్లో మాత్రం కొన్ని చోట్ల పోటీ చేసింది.

గతంలో తెలంగాణ ఆవిర్భవ దినోత్సవం రోజున హైదరాబాద్‌లో నవనిర్మాణ సంకల్ప సభ నిర్వహించేందుకు పవన్ ప్రయత్నించగా, అనేక తెలంగాణ పార్టీలు అభ్యంతరం వ్యక్తం చేశాయి. పోలీసులు అనుమతి రద్దు చేయడంతో పవన్ ఒక విలేకరుల సమావేశంతో సరిపెట్టుకున్నారు.

ప్రస్తుతం ఆంధ్రప్రదేశ్ డిప్యూటీ ముఖ్యమంత్రిగా ఉన్న పవన్ కళ్యాణ్ తెలంగాణలో కూడా చేరికల్ని ప్రోత్సహించి వచ్చే ఎన్నికల్లో పోటీ చేయాలని భావిస్తున్నారు. జనసేన ఆఫీస్‌లో ప్రత్యేక డెస్క్ ఏర్పాటు ఇందుకు సంకేతం. జనసేన చేరికల వ్యూహం ఎలా ఫలిస్తుంది, ఏ పార్టీల నుంచి నేతలు జనసేనలో చేరతారు అన్నది భవిష్యత్తులో నిర్ణయమవుతుంది.