విద్యా సంక్షోభంపై బీఆర్ఎస్ నేత జీవన్‌రెడ్డి తీవ్ర విమర్శలు

బీఆర్ఎస్ నేత, మాజీ ఎమ్మెల్యే జీవన్‌రెడ్డి తెలంగాణలోని విద్యా, ఉద్యోగ సమస్యలపై కాంగ్రెస్ ప్రభుత్వంపై తీవ్ర విమర్శలు చేశారు. ఫీజు రీయింబర్స్మెంట్ బకాయిలు, నివాస పాఠశాలల విలీనం తదితర అంశాలపై ఆయన మండిపడ్డారు.

గత కేసీఆర్ ప్రభుత్వ హయాంలో ఫీజు రీయింబర్స్మెంట్ పథకం సక్రమంగా అమలైందని, ప్రస్తుతం రూ.10 వేల కోట్ల బకాయిలు పేరుకుపోయాయని ఆయన ఆరోపించారు. హైకోర్టు ఆదేశాలతో కొత్తగా కాలేజీల్లో చేరే విద్యార్థులు ఫీజు చెల్లించుకోవాల్సిన పరిస్థితి ఏర్పడిందని, కళాశాల యాజమాన్యాలు సొంతంగా ఫీజు వసూలు చేసుకునేందుకు జీవో-9 అవకాశం కల్పించిందని వివరించారు.

బీసీ రెసిడెన్షియల్ స్కూళ్లను యంగ్ ఇండియా ఇంటిగ్రేటెడ్ పాఠశాలలుగా మార్చడంపైనా జీవన్‌రెడ్డి అభ్యంతరం వ్యక్తం చేశారు. గతంలో కేసీఆర్ ప్రభుత్వం ఏర్పాటు చేసిన జ్యోతీబాపూలే స్కూళ్లను మూసివేసి కాంగ్రెస్ తన పేరు మీద బడులు ప్రారంభించాలని చూస్తోందని విమర్శించారు.

ఉద్యోగాల విషయంలో 30 నెలల్లో 3 లక్షల ఉద్యోగాలు ఇస్తామని రేవంత్‌రెడ్డి చెప్పగా, 17 వేలకు మించి ఉద్యోగాలు కల్పించలేదని ఆరోపించారు. మెగా డీఎస్సీ నోటిఫికేషన్ విడుదల కాలేదని, పోలీసు కానిస్టేబుల్ ఖాళీలు 19 వేలు ఉన్నా 5 వేలకే నోటిఫికేషన్ ఇస్తారని చెప్పారు. రాజీవ్ యువవికాసం నిధులు సైతం వెచ్చించలేదన్నారు.

జీవో-9 ను రద్దు చేసి, పాత ఫీజు రీయింబర్స్మెంట్ పద్దతిని కొనసాగించాలని డిమాండ్ చేశారు. ప్రభుత్వం నుంచి ఈ ఆరోపణలపై తక్షణం స్పందన రావాల్సి ఉంది.