హైదరాబాద్ వర్షం: JNTU-H 2018 వరద నియంత్రణ ప్రణాళిక ఏమైంది?

హైదరాబాద్ నగరంలో వర్షం వచ్చినప్పుడు రోడ్లు చెరువులుగా మారడం, ట్రాఫిక్ స్తంభించడం సాధారణ సమస్య. ఈ పరిస్థితికి శాశ్వత పరిష్కారంగా 2018లో JNTU-హైదరాబాద్ కు చెందిన సెంటర్ ఆఫ్ ఎక్సలెన్స్ ఇన్ డిజాస్టర్ మేనేజ్మెంట్ ఒక సమగ్ర వరద నియంత్రణ ప్రణాళికను రూపొందించింది.

నగరంలో 229 వరద ప్రభావిత ప్రాంతాలను గుర్తించి, వాటి నివారణకు రూ.4,900 కోట్ల ప్రాజెక్ట్ ప్రతిపాదించింది. భారీ వర్షాల సమయంలో నీరు రోడ్లపై నిలవకుండా ప్రత్యేక స్టార్మ్ వాటర్ డ్రైన్లు, ఫ్లడ్ బైపాస్ ఛానల్స్, నీటి నిల్వ ట్యాంకులు, సౌరశక్తి పంపింగ్ వ్యవస్థలు ఏర్పాటు చేయాలని సూచించింది. 636 నీటి నిల్వ ట్యాంకులను పరస్పరం అనుసంధానం చేస్తే వరద ముప్పు గణనీయంగా తగ్గుతుందని నివేదిక తెలిపింది.

పట్టణీకరణతో చెరువులు, కుంటలు, నీటి మార్గాలు కనుమరుగవడం, వర్షపు నీటితో మురుగునీరు కలవడం ప్రధాన కారణాలని గుర్తించింది. అలాగే వర్షాకాలంలో ట్రాఫిక్ వేగం 20-30% తగ్గుతుందని, దీనివల్ల రోజుకు రూ.9 కోట్ల వరకు నష్టం వాటిల్లుతుందని అంచనా వేసింది. ఏడాదికి ఈ నష్టం రూ.3,000 కోట్లకు చేరుతుందని హెచ్చరించింది.

ప్రస్తుతం ఈ ప్రణాళిక నిధుల కొరతతో అమలు కాలేదు. నిపుణులు దీన్ని తాజా పరిస్థితులకు అనుగుణంగా అప్‌డేట్ చేసి అమలు చేయాలని సూచిస్తున్నారు. తాజా వరద సమస్యల నేపథ్యంలో ఈ నివేదిక మళ్లీ చర్చకు వచ్చింది.