జోహన్నెస్‌బర్గ్‌లో వలస వ్యతిరేక నిరసనలు హింసాత్మకంగా మారాయి

దక్షిణాఫ్రికాలోని జోహన్నెస్‌బర్గ్ నగరంలో వలసదారుల వ్యతిరేక నిరసనలు హింసాత్మకంగా మారాయి. వేలాది మంది నిరసనకారులు నగర కేంద్రంలో మంటలు రేపుతూ ఆందోళన చేపట్టారు. అక్రమ వలసలు, ఉద్యోగాల కొరత, నేరాల పెరుగుదలపై స్థానికులు ఆగ్రహం వ్యక్తం చేశారు. నిరసనలు ఊహించని స్థాయిలో హింసాత్మకంగా మారడంతో పోలీసులు, భద్రతా బలగాలు భారీగా మోహరించారు. నిరసనకారులు టైర్లు, చెత్త తదితర వస్తువులకు నిప్పంటించారు. దీంతో నగరంలోని పలు ప్రాంతాలు దట్టమైన పొగతో నిండిపోయాయి. ఆందోళనకారులను నియంత్రించేందుకు పోలీసులు టియర్ గ్యాస్, వాటర్ కెనాన్లను ఉపయోగించాల్సి వచ్చింది. దక్షిణాఫ్రికాలో ఇటీవల కాలంలో విదేశీయులపై దాడులు పెరుగుతున్న నేపథ్యంలో ఈ నిరసనలు చోటు చేసుకున్నాయి. ప్రధానంగా జింబాబ్వే, మొజాంబిక్, నైజీరియా నుంచి వచ్చిన వలసదారులే లక్ష్యంగా ఈ ఆందోళనలు జరుగుతున్నాయి. దక్షిణాఫ్రికాలో నిరుద్యోగం 32 శాతంగా ఉండగా, స్థానికులు విదేశీయులే తమ ఉద్యోగాలు లాగేస్తున్నారని ఆరోపిస్తున్నారు. ఆపరేషన్ దుడులా పేరిట గతంలోనూ ఇలాంటి నిరసనలు చెలరేగిన విషయం తెలిసిందే. గతంలో ఇలాంటి హింసాత్మక సంఘటనల్లో పలువురు మరణించడంతో ప్రస్తుత పరిస్థితిపై అంతర్జాతీయ సమాజం ఆందోళన వ్యక్తం చేస్తోంది.