తునిలో రెండేళ్ల జ్ఞానేశ్వరి ఆచూకి 15వ రోజు; గాలింపు తగ్గించిన పోలీసులు, టెక్నికల్ ఎవిడెన్స్‌పై దృష్టి

కాకినాడ జిల్లా తుని సమీపంలో రెండేళ్ల జ్ఞానేశ్వరి అనే చిన్నారి తప్పిపోయి నేటికి 15 రోజులు పూర్తయ్యాయి.

పోలీసులు, ఎన్డీఆర్ఎఫ్, ఎస్డీఆర్ఎఫ్, అటవీ శాఖ బృందాలు, డ్రోన్లతో సహా పెద్ద ఎత్తున గాలింపు చేపట్టినా ఇప్పటివరకు ఎలాంటి ఆనవాళ్లు లభించలేదు. 50-60 ఎకరాల పామాయిల్ తోట, చుట్టుపక్కల కొండలను క్షుణ్ణంగా తనిఖీ చేసినా ఫలితం లేదు.

ఈ నేపథ్యంలో అక్కడి గాలింపు చర్యలను తగ్గించారు. ఎన్డీఆర్ఎఫ్ బలగాలను వెనక్కి పంపించగా, కొద్ది మంది ఎస్డీఆర్ఎఫ్ సిబ్బంది మాత్రమే ఉన్నారు. పోలీసులు ఇప్పుడు టెక్నికల్ ఎవిడెన్స్ ఆధారంగా దర్యాప్తు ముమ్మరం చేశారు.

పాప తప్పిపోయిన రోజు ఊర్లోని సీసీటీవీలో ఒక పెంపుడు కుక్క కనిపించింది. అది దాదాపు అర కిలోమీటర్ దూరంలోని తోట వైపు నుంచి వచ్చినట్టు రికార్డయింది. ఎవరైనా నిందితులు పాపను తీసుకెళ్లి ఉంటే, ఆ కుక్క వారిని వెంబడించి ఊర్లోకి వచ్చిందా అనే కోణంలో పోలీసులు విచారణ చేస్తున్నారు.

బాలల హక్కుల కమిషన్ చైర్మన్ వీవీఎస్ఎన్ రాజు తుని వెళ్లి తల్లిదండ్రులను పరామర్శించారు. ప్రభుత్వం అన్ని విధాలా పాపను వెతికిస్తుందని, టెక్నికల్ ఆధారాలతో దర్యాప్తు వేగవంతం చేస్తామని హామీ ఇచ్చారు. ఈ కేసులో ఇతర అనుమానితులను కూడా విచారిస్తున్నట్టు పోలీసు వర్గాలు తెలిపాయి.