కాకినాడ కౌంటింగ్ కేంద్రంలో ZP CEO, RDO మధ్య వాగ్వాదం

కాకినాడ పీఆర్ కాలేజీలోని కౌంటింగ్ కేంద్రంలో ZP CEO లక్ష్మణరావు, RDO మల్లిబాబు మధ్య వాగ్వాదం జరిగింది. MPTC, ZPTC ఏజెంట్లకు కనీస సౌకర్యాలు కల్పించడంపై ఇద్దరి మధ్య విభేదాలు తలెత్తాయి.

కౌంటింగ్ ఉదయం 8 గంటలకు ప్రారంభం కావాల్సి ఉంది. కానీ దాదాపు గంటన్నర ఆలస్యంగా ప్రారంభమైంది. మొదట MPTC కౌంటింగ్ మాత్రమే మొదలైంది. దీంతో ZPTC ఏజెంట్లు బయటే వేచి ఉన్నారు. తమకు తాగునీరు, లోపలికి వెళ్లే పాస్ వంటి కనీస సౌకర్యాలు లేవని ఏజెంట్లు చెప్పారు.

కొందరు ఏజెంట్లు ఎమ్మెల్యేకు ఫోన్ చేసి ఈ సమస్యను తెలిపారు. దీనిపై ఎమ్మెల్యే ZP CEO వైపు అసంతృప్తి వ్యక్తం చేసినట్టు ఉద్యోగులు చెప్పారు. అదే సమయంలో RDO మల్లిబాబు తాను లేబర్ కాదని, మంచినీళ్లు మోసుకెళ్లాల్సిన బాధ్యత తనది కాదని అన్నారు. రెవెన్యూ సిబ్బంది ZP ఉద్యోగులకు సహాయం మాత్రమే చేస్తుందని ఆయన చెప్పారు.

ఇద్దరి మధ్య వాగ్వాదం అందరి ముందు జరగడంతో కౌంటింగ్ కేంద్రంలో ఉద్రిక్తత నెలకొంది. కలెక్టర్, పోలీసులు వెంటనే జోక్యం చేసుకున్నారు. ఇద్దరిని పక్కకు తీసుకెళ్లి సముదాయించే ప్రయత్నం చేశారు. అయినా వారు వెంటనే వెనక్కి తగ్గలేదని ఉద్యోగులు చెప్పారు.

కాకినాడ రెవెన్యూ డివిజన్ పరిధిలోని మండలాలతో పాటు సామర్లకోట, తొండంగి ప్రాంతాలకు సంబంధించిన కౌంటింగ్ ఇక్కడ కొనసాగుతోంది. పెద్దాపురంలో మరో 10 మండలాల కౌంటింగ్ జరుగుతోంది. అక్కడ సౌకర్యాలు కొంత మెరుగ్గా ఉన్నాయని ఉద్యోగులు చెప్పారు. 11-12 గంటల వరకు ZPTC కౌంటింగ్ పూర్తిగా మొదలుకాలేదు; అభ్యర్థుల సమక్షంలో పోస్టల్ బ్యాలెట్ల కౌంటింగ్ మాత్రమే పూర్తైంది. ZPTC కౌంటింగ్ అర్ధరాత్రి వరకు కొనసాగవచ్చని సిబ్బంది చెప్తున్నారు.