కంది సాగులో మెరుగైన యాజమాన్య పద్ధతులు: వరంగల్ వ్యవసాయ పరిశోధనా స్థానం శాస్త్రవేత్త సూచనలు

వరంగల్ ప్రాంతీయ వ్యవసాయ పరిశోధనా స్థానం శాస్త్రవేత్త డాక్టర్ సంధ్యా కిషోర్ ఖరీఫ్ కంది సాగులో మెరుగైన దిగుబడి కోసం పాటించాల్సిన యాజమాన్య పద్ధతులు వివరించారు.

రైతులు విత్తే నేలలను బట్టి రకాలు ఎంపిక చేసుకోవాలి. తేలికపాటి ఎర్ర చెలక నేలల్లో స్వల్పకాలిక లేదా మధ్యస్థ కాలిక రకాలు విత్తుకోవాలి. పిఆర్జి 176, వరంగల్ కంది 1, డబ్ల్యూబిజి 97 వంటి రకాలు వీటిలో ఉత్తమమని శాస్త్రవేత్త చెప్పారు. నల్లరేగడి నేలల్లో మధ్యకాలిక రకాలు ఎంచుకోవాలి. డబ్ల్యూఆర్జి 65, రుద్రేశ్వర, ఆశ, మారుతి, లక్ష్మి లాంటి రకాలు ఈ నేలలకు అనువైనవి.

ఫైటాఫ్తోరా ఎండు తెగులను తట్టుకోలేని ఎల్ఆర్జి 41 వంటి రకాలు ఎంచుకోవద్దని డాక్టర్ సంధ్యా కిషోర్ సూచించారు. తెగులు నిరోధక రకాలైన వరంగల్ కంది 1, రుద్రేశ్వర, ఆశ రకాలు మేలు. ఎకరాకు 2 నుంచి 3 కిలోల విత్తనం సరిపోతుంది.

విత్తే ముందు చివరి దుక్కిలో బాగా మాగిన 2 టన్నుల పశువుల ఎరువు, 50 కిలోల డీఏపీ ఎరువు, 2 కిలోల పీఎస్బీ కల్చర్‌ను 200 కిలోల పశువుల ఎరువుతో కలిపి వేయాలి. విత్తనాన్ని 10 గ్రాముల ట్రైకోడర్మాతో శుద్ధి చేయాలి. మొదటిసారి వేసే రైతులు 100 గ్రాముల రైజోబియం కల్చర్‌ను 4 కిలోల విత్తనానికి పట్టించాలి.

అధిక వర్షాలతో నీరు నిలవకుండా బోదె సాళ్ల అంచులపై విత్తనం పెట్టాలి. తేలికపాటి నేలల్లో సాళ్ల మధ్య దూరం 90 నుంచి 150 సెం.మీ., మొక్కల మధ్య 20 సెం.మీ. ఉంచాలి. నల్లరేగడి నేలల్లో సాళ్ల మధ్య 150–180 సెం.మీ. (5–6 అడుగులు) ఎడం పాటించాలి.

కలుపు నివారణకు విత్తిన 24–36 గంటల్లో పెండిమిథాలిన్ 1.3–1.6 లీటర్లు పిచికారీ చేయాలి. 20 రోజుల తర్వాత వెడల్పాటి ఆకుల కలుపుకు ఇమాజిథాపిర్ 300 మి.లీ., గడ్డి జాతి కలుపుకు క్విజలోపాప్ ఇథైల్ 400 మి.లీ. పిచికారీ చేయాలి. 30, 60 రోజుల వయసులో ట్రాక్టర్ లేదా అరకతో అంతరకృషి చేయాలి.

పూత, కాయ ఊరే దశల్లో తేలికపాటి తడులు ఇస్తే దిగుబడి పెరుగుతుంది. శాస్త్రీయ యాజమాన్య పద్ధతులు పాటిస్తే ఎకరాకు 8 నుంచి 10 క్వింటాళ్ల దిగుబడి సాధించవచ్చని డాక్టర్ సంధ్యా కిషోర్ తెలిపారు.