కరీంనగర్‌లో 50% లోటు వర్షపాతం; ఆరుతడి పంటల వైపు వెళ్లాలని వ్యవసాయాధికారి సూచన

కరీంనగర్ జిల్లాలో ఖరీఫ్ సీజన్ ప్రారంభమై నెల రోజులు గడిచినా వర్షాలు పడలేదు. సాధారణ వర్షపాతంతో పోలిస్తే 50 శాతానికి పైగా లోటు నమోదైంది. ఎల్నీనో ప్రభావం వల్లే ఈ వర్షాభావ పరిస్థితులు నెలకొన్నాయని జిల్లా వ్యవసాయాధికారి భాగ్యలక్ష్మి వివరించారు.

ఈ నేపథ్యంలో రైతులు వరి సాగు తగ్గించుకోవాలని ఆమె సూచించారు. జిల్లాలో సాధారణంగా 2.8 లక్షల ఎకరాల్లో వరి పండిస్తుండగా, ఈసారి పప్పు ధాన్యాలు, నూనె గింజలు, చిరుధాన్యాలు సాగు చేయడం మేలని చెప్పారు. కంది, మినుము, పెసర వంటి పప్పు ధాన్యాలు, నువ్వులు వంటి నూనె గింజలు, జొన్న, సజ్జ, రాగి వంటి చిరుధాన్యాలు వైపు మళ్లాలని సలహా ఇచ్చారు. వరి నేలల్లో కూడా పప్పు ధాన్యాలు సాగు చేయవచ్చని, కందిని ఇంటర్ క్రాప్‌గా వేసుకోవచ్చని తెలిపారు.

ప్రత్యామ్నాయ పంటల విత్తనాలు రేపటి (30వ తారీఖు) నుంచి అన్ని రైతు వేదికల్లో అందుబాటులో ఉంటాయని భాగ్యలక్ష్మి ప్రకటించారు. రాష్ట్ర వ్యవసాయ శాఖ మంత్రి తుమ్మల నాగేశ్వరరావు ఈ కార్యక్రమాన్ని వర్చువల్‌గా ప్రారంభిస్తారు. జిల్లాలో 76 రైతు వేదికల ద్వారా ఈ విత్తనాలు విక్రయిస్తామని చెప్పారు. యూరియా విషయంలో జిల్లాలో 16 వేల మెట్రిక్ టన్నుల నిల్వలు ఉన్నాయని, వర్షాలు కురిసిన వెంటనే యూరియా యాప్ తెరిచి సరఫరా చేస్తామని వివరించారు.

పంట మార్పిడిపై రైతుల్లో అవగాహన కోసం గ్రామ సభలు, మండల స్థాయి సమావేశాలు, 'రైతు ముంగిట్లో శాస్త్రవేత్తలు', 'కేతీ బచావు అభియాన్' వంటి కార్యక్రమాలు నిర్వహిస్తున్నట్టు ఆమె తెలిపారు. వర్షం లేని పక్షంలో భూమిలో 50-60 మిల్లీమీటర్ల తేమ ఉంటేనే విత్తనాలు నాటాలని సూచించారు. లేకపోతే వేడి కారణంగా మొలకలు తక్కువగా వచ్చే అవకాశం ఉందని హెచ్చరించారు.