కావేరి యూనివర్సిటీలో డ్రోన్ అకాడమీ: 2026 అడ్మిషన్లు ప్రారంభం

హైదరాబాద్ సమీపంలోని కావేరి యూనివర్సిటీ విద్యార్థుల కోసం ప్రత్యేక డ్రోన్ అకాడమీని ఏర్పాటు చేసింది. ఈ అకాడమీలో అగ్రికల్చర్, టెక్నాలజీ విద్యార్థులకు డ్రోన్ టెక్నాలజీపై శిక్షణ ఇస్తారు. 2026 విద్యా సంవత్సరానికి సంబంధించిన అడ్మిషన్లు ప్రస్తుతం తెరిచి ఉన్నాయి.

అకాడమీ శిక్షణ పూర్తి చేసినవారికి రిమోట్ పైలట్ సర్టిఫికేట్ (లైసెన్స్) అందిస్తారు. డ్రోన్ ఎగరేయడానికి ఈ లైసెన్స్ తప్పనిసరి. శిక్షణలో ముందుగా సిములేషన్ ల్యాబ్‌లో వీడియో గేమ్ మాదిరిగా డ్రోన్ నడపడం నేర్పిస్తారు. డ్రోన్ నియంత్రణ, ఎత్తు నిర్వహణ, ముందుకు వెనుకకు తిప్పడం వంటివి ఇక్కడ ప్రాక్టీస్ చేయవచ్చు. సిములేషన్ తర్వాత, విద్యార్థులు అగ్రీ డ్రోన్లు, ట్రైనింగ్ డ్రోన్లు, మల్టీస్పెక్ట్రల్ డ్రోన్ వంటి నిజమైన డ్రోన్లతో ఫ్లయింగ్ గ్రౌండ్స్‌లో శిక్షణ పొందుతారు.

అగ్రికల్చర్ విద్యార్థులకు పంట ఆరోగ్య పర్యవేక్షణ, మల్టీస్పెక్ట్రల్ కెమెరాలతో పంట ప్రాంతాన్ని గుర్తించి పెస్టిసైడ్స్, ఫెర్టిలైజర్లను ఖచ్చితంగా స్ప్రే చేసే విధానం నేర్పిస్తారు. దీనివల్ల స్ప్రే వాడకం తగ్గుతుంది. టెక్నాలజీ విద్యార్థులకు డ్రోన్‌లో ఉండే సెన్సార్లు, ఫ్లైట్ కంట్రోలర్, ఆప్టికల్ సెన్సార్, టెర్రన్ సెన్సార్, రియల్ టైం డేటా ఇంటిగ్రేషన్ గురించి వివరిస్తారు. ఆధునిక డ్రోన్ టెక్నాలజీలో ఈ అంశాలు ఎలా కలిసి పనిచేస్తాయనేది ప్రాక్టికల్‌గా నేర్చుకుంటారు.

ఈ డ్రోన్ అకాడమీలో కావేరి యూనివర్సిటీ అంతర్గత విద్యార్థులతో పాటు బయటి వ్యక్తులు కూడా శిక్షణ పొందవచ్చు. ట్రైనింగ్ అనంతరం లభించే రిమోట్ పైలట్ సర్టిఫికేట్ ద్వారా ఫోటోగ్రఫీ, వీడియోగ్రఫీ, వ్యవసాయ సేవలు, ప్యాకేజీ డెలివరీ వంటి రంగాల్లో ఉద్యోగ అవకాశాలు పొందవచ్చు.