కవ్వాల్ టైగర్ జోన్‌లో జీవవైవిధ్యం, వన్యప్రాణుల సంరక్షణ

ఉమ్మడి ఆదిలాబాద్ జిల్లాలోని కవ్వాల్ టైగర్ జోన్ విస్తృతమైన జీవవైవిధ్యానికి నిలయంగా ఉంది. 2012లో ఏర్పడిన ఈ టైగర్ జోన్ మంచిర్యాల జిల్లా జన్నారం మండలం ప్రధాన కేంద్రంగా, నిర్మల్, ఆసిఫాబాద్ జిల్లాల సరిహద్దుల్లో విస్తరించింది.

మహారాష్ట్రలోని తడోబా అంధేరి టైగర్ రిజర్వ్ నుండి పులులు ఈ అడవుల మీదుగా వలస వస్తాయని అటవీ అధికారులు తెలిపారు. టేకు, వెదురు మిశ్రమ అడవులు, భారీ వృక్షాలు ఇక్కడి ప్రత్యేకత. అరుదైన ఔషధ మొక్కలకు కూడా ఈ అడవి ఆవాసంగా మారింది.

పులులు, చిరుతలు, అడవి దున్న, నక్క, అడవి కుక్క, పునుగుపిల్లి, మణుబోతు, చుక్కల దుప్పి, సాంబారు దుప్పి, కొండగొర్రె, గడ్డి జింక, ఎలుగుబంట్లు వంటి అనేక వన్యప్రాణులు ఇక్కడ నివసిస్తాయి. వీటి సంతతి పెరుగుతోందని అధికారిక గణాంకాలు సూచిస్తున్నాయి.

పక్షుల జాతులకు కూడా ఇది కేంద్రంగా నిలిచింది. వడ్రంగి పిట్ట, పచ్చపిట్ట, ఇండియన్ కూకు వంటి పక్షులతో పాటు అనేక వలస పక్షులు ఇక్కడికి వస్తాయి. ఏటా సఫారీలు, నేచర్ వాక్, బర్డ్ వాచింగ్ కార్యక్రమాలను అటవీ శాఖ నిర్వహిస్తోంది.

స్థానికులు, విదేశీ పర్యాటకులు ఇక్కడి ప్రశాంత వాతావరణాన్ని, జీవవైవిధ్యాన్ని ప్రశంసిస్తున్నారు. అభయారణ్యాన్ని మరింత అభివృద్ధి చేయాలని స్థానికులు అభ్యర్థించారు. అటవీ నరికివేత, జంతువుల వేటను నిరోధించడానికి ప్రత్యేక చర్యలు తీసుకుంటున్నట్లు అధికారులు తెలిపారు. అడవిని కాపాడుకోవాల్సిన బాధ్యత అందరిపైనా ఉందని వారు చెప్పారు.