కేబీఆర్ పార్క్ చుట్టూ ఆదివారం వన్ వే, యూ-టర్న్లు మూసివేత

హైదరాబాద్‌లోని కేబీఆర్ పార్క్ సమీపంలో స్టీల్ ఫ్లై ఓవర్, అండర్‌పాస్ నిర్మాణ పనులు వేగంగా జరుగుతున్నాయి. ఈ పనుల కారణంగా ఈ ఆదివారం (మార్చి 16) ఉదయం 10 గంటల నుంచి రాత్రి 8 గంటల వరకు ట్రాఫిక్ ఆంక్షలు విధించారు.

కేబీఆర్ పార్క్ చుట్టూ ఉన్న ప్రధాన రహదారిని పూర్తిగా వన్ వేగా మార్చారు. యూ-టర్న్ లు అన్నీ మూసివేశారు. బంజారా హిల్స్, జూబ్లీ హిల్స్ మీదుగా వెళ్లే వాహనదారులు ప్రత్యామ్నాయ మార్గాలు ఉపయోగించాలి.

ఎన్‌టీఆర్ భవన్ నుంచి బసవతారకం హాస్పిటల్, అగ్రసేన్ ఐలాండ్, ఓమేగా హాస్పిటల్, భారతీయ విద్యాభవన్ మీదుగా వెళ్లాలి. సాఫ్ గూడా, శ్రీనగర్ కాలనీ నుంచి జూబ్లీ హిల్స్, మాదాపూర్ వైపు వెళ్లేవారు ఇందిరానగర్ రోడ్, వెంకటగిరి, డైమండ్ హౌస్, రోడ్ నంబర్ 10, అల్కాజర్ మీదుగా ప్రయాణించాలి. ఐటీసీ కోహనూర్, దుర్గం చెరువు నుంచి చెక్‌పోస్ట్, పంచగుట్ట వైపు వెళ్లేవారు రోడ్ నంబర్ 60, 67 ద్వారా వెళ్లాలి.

ట్రాఫిక్ బోర్డులను అనుసరించాలని, గూగుల్ మ్యాప్స్‌పై పూర్తిగా ఆధారపడవద్దని పోలీసులు సూచించారు. నిర్మాణం పూర్తయ్యే వరకు ఇలాంటి ఆంక్షలు కొనసాగుతాయి.