ఖైరతాబాద్ మహాగణపతి ఉత్సవాల ఏర్పాట్లు మొదలు – ఈ ఏడాది పంచముఖ సంకటహర మహాగణపతి రూపంలో దర్శనం

హైదరాబాద్‌లోని ఖైరతాబాద్ మహాగణపతి ఉత్సవాలకు ఏర్పాట్లు ప్రారంభమయ్యాయి. గురువారం కర్ణపూజతో విగ్రహ నిర్మాణ పనులు మొదలయ్యాయి.

ఈ ఏడాది ఖైరతాబాద్ మహాగణేశుడు పంచముఖ సంకటహర మహాగణపతి రూపంలో భక్తులకు దర్శనమివ్వనున్నారు. 72వ సంవత్సరంలోకి అడుగుపెట్టిన ఈ ఉత్సవాల గురించి ఖైరతాబాద్ గణేష్ ఉత్సవ కమిటీ చైర్మన్ రాజ్‌కుమార్ వివరాలు తెలిపారు.

విగ్రహం 69 అడుగుల ఎత్తులో మట్టితో తయారవుతోంది. పంచ ముఖాలు, పది హస్తాలు, ఐదు సర్పాలతో ఈ వినాయకుడు దర్శనమివ్వనున్నారు. ఒకవైపు సోమేశ్వరాలయం, మరోవైపు కాళీమాత అమ్మవారి విగ్రహాలు కూడా భాగంగా ఉంటాయి.

తమిళనాడు శిల్పి రాజేందర్ నేతృత్వంలో ఐదు రాష్ట్రాల నుంచి వచ్చిన 100 మందికి పైగా కళాకారులు విగ్రహాన్ని తయారు చేస్తారు. రాజస్థాన్ క్లే పౌడర్‌ని ఉపయోగిస్తున్నామని రాజ్‌కుమార్ చెప్పారు.

ఇప్పటికి 81 రోజుల సమయం ఉండగా, మరో రెండు మూడు రోజుల్లో పూర్తిస్థాయి పనులు ప్రారంభమవుతాయని కమిటీ సభ్యులు తెలిపారు.