ఖైరతాబాద్ గణేష్ కర్రపూజ: 14 న ముఖ్యమంత్రి, గవర్నర్ ప్రారంభోత్సవంలో పాల్గొంటారు

హైదరాబాద్‌లోని ప్రసిద్ధ ఖైరతాబాద్ గణేష్ ఉత్సవ కమిటీ నేడు కర్రపూజ నిర్వహించింది. ఈ ఏడాది గణేష్‌ నవరాత్రులకు ముందస్తుగా జరిగే ఈ తొలి పూజా కార్యక్రమంలో కమిటీ సభ్యులు పాల్గొన్నారు.

కమిటీ చైర్మన్ రాజ్‌కుమార్, సభ్యులు రాజ్యసభ సభ్యులు అనిల్ కుమార్ యాదవ్, విజయ్ రెడ్డి, మహేష్ యాదవ్ తదితరులు కర్రపూజలో పాల్గొన్నారు. ఈ సందర్భంగా కమిటీ ప్రతినిధులు మాట్లాడుతూ ఖైరతాబాద్ గణేష్‌ ఉత్సవం అన్ని రాజకీయ పార్టీలకు అతీతమైనదని, ప్రజలందరికీ స్వాగతం అని పేర్కొన్నారు. ముఖ్యమంత్రి రేవంత్ రెడ్డికి ప్రత్యేక ధన్యవాదాలు తెలిపారు.

ఈ నెల 14న ఖైరతాబాద్‌లో ఏర్పాటు చేసే భారీ వినాయక విగ్రహానికి మొదటి పూజ ముఖ్యమంత్రి రేవంత్ రెడ్డి, గవర్నర్ చేతుల మీదుగా జరుగుతుందని కమిటీ తెలిపింది. ప్రముఖులు, సినీ తారలు కూడా ఈ కార్యక్రమానికి హాజరయ్యే అవకాశం ఉందని చెప్పారు. 11 రోజుల పాటు భక్తులకు, పోలీసు, మీడియా సిబ్బందికి ప్రతిరోజూ ప్రసాదాలు, అల్పాహారం అందించేలా ఏర్పాట్లు చేస్తున్నట్టు వెల్లడించారు.

కర్రపూజ ఒక నెల ఆలస్యంగా జరిగినా సాంకేతిక బృందం సిద్ధంగా ఉందని, వ్యవస్థీకృత విధానంలో పనులు జరుగుతున్నాయని కమిటీ వివరించింది. GHMC, నీటి సరఫరా, విద్యుత్ శాఖ, పోలీసు విభాగాల సహకారానికి కృతజ్ఞతలు తెలిపారు. ఖైరతాబాద్ గణేష్‌ ముంబై లాల్బాగ్‌ రాజా వలె వాణిజ్యపరం కాకుండా భక్తిప్రధానమని కమిటీ స్పష్టం చేసింది.