ఖమ్మంలో RMP డాక్టర్ ఇంజెక్షన్‌తో బాలిక మృతి; నిందితుడు పరారీ

ఖమ్మం జిల్లా బసవాపురంలో ఆదివారం సాయంత్రం ఒక RMP డాక్టర్ ఇచ్చిన ఇంజెక్షన్ వల్ల ఎనిమిదో తరగతి విద్యార్థిని మృతి చెందింది. హేమశ్రీ అనే బాలిక బోనాల పండగ సందర్భంగా ఇంటికి వచ్చింది.

స్వల్ప జలుబు, దగ్గుతో బాధపడుతున్న ఆ బాలికను తల్లిదండ్రులు స్థానిక RMP మారుతి సంపత్ దగ్గరకు తీసుకెళ్లారు. ఆయన ఒక ఇంజెక్షన్ ఇచ్చి, మరొకటి ఇస్తుండగా బాలిక స్పృహతప్పి పడిపోయింది. నోటి నుంచి నురగ వచ్చి ఊపిరాడక కొట్టుమిట్టాడింది.

కుటుంబ సభ్యులు వెంటనే ఖమ్మంలోని ఒక ప్రైవేటు ఆస్పత్రికి తరలించగా, పరీక్షించిన వైద్యులు బాలిక మృతి చెందినట్లు తెలిపారు. తల్లిదండ్రులు, బంధువులు ఆసుపత్రి వద్ద ఆందోళన వ్యక్తం చేశారు. పోలీసులు జోక్యం చేసుకొని మృతదేహాన్ని ప్రభుత్వ ఆసుపత్రికి తరలించారు.

తండ్రి చల్ల రమేష్ ఫిర్యాదు మేరకు పోలీసులు కేసు నమోదు చేసి దర్యాప్తు ప్రారంభించారు. RMP డాక్టర్ మద్యం సేవించి వైద్యం చేసినట్లు కుటుంబ సభ్యులు ఆరోపించారు. పోలీసులు బ్రీత్ ఎనలైజర్ పరీక్ష చేయగా మద్యం సేవించినట్లు నిర్ధారణ అయిందని కుటుంబం తెలిపింది. నిందితుడు ప్రస్తుతం పరారీలో ఉన్నట్లు సమాచారం.