ఖరీఫ్ కంది: అధిక దిగుబడి రకాలు, సాగు పద్ధతులు

ఖరీఫ్ కంది సాగుకు రైతులు సిద్ధమవుతున్న నేపథ్యంలో, పాలెం ప్రాంతీయ వ్యవసాయ పరిశోధన స్థానం శాస్త్రవేత్త ఈశ్వర్ రెడ్డి సాగు మెళకువలు వివరించారు.

కంది విత్తే సమయం జూన్ 15 నుంచి జూలై వరకు ఉంటుంది. వర్షాలు ఆలస్యమైతే ఆగస్టు చివరి వరకు కూడా విత్తుకోవచ్చని శాస్త్రవేత్తలు తెలిపారు.

ఎర్ర చలకా నేలలు, వర్షాధారం మాత్రమే ఉన్న రైతులు మధ్య స్వల్పకాలిక రకాలు ఎంచుకోవాలి. నల్లరేగడి నేలలు, నీటి సదుపాయం ఉన్న రైతులు మధ్యకాలిక రకాలు ఎంచుకోవాలి.

మధ్య స్వల్పకాలిక రకాలు 140–160 రోజుల్లో పరిపక్వతకు వస్తాయి. పాలెం నుంచి విడుదలైన PRG 176 (ఉజ్వల) 130–135 రోజుల్లో పంట ఇస్తుంది. వరంగల్ పరిశోధన స్థానం నుంచి విడుదలైన WRG 93, WRG 97, WRG 121 రకాలు 6–8 క్వింటాల దిగుబడి సామర్థ్యం కలిగి ఉన్నాయి.

మధ్యకాలిక రకాలు 160–180 రోజుల్లో పంట ఇస్తాయి. ICPL 87119 (ఆశ) రకం ఎండు తెగులు, వేరు తెగులు రెంటినీ తట్టుకుంటుంది. వరంగల్ నుంచి విడుదలైన WRG 65 (రుద్రేశ్వర), తాండూరు నుంచి TDRG 4 (హనుమ), 2021లో విడుదలైన TDRG 59 (తెలంగాణ కంది) — ఇవి 7–8 క్వింటాల దిగుబడి ఇస్తాయి. WRG 255 రకం సగటున 8–8.8 క్వింటాల దిగుబడి ఇస్తుంది. పత్తి వంటి ఇతర పంటలతో అంతర పంటగా కూడా దీన్ని సాగు చేయవచ్చు.

విత్తన మోతాదు విషయంలో వానకాలంలో ఎకరాకు 2–3 కిలోలు, యాసంగిలో 6–8 కిలోలు సరిపోతాయి. ఎర్రనేలల్లో సాళ్ల మధ్య దూరం 90–120 cm, నల్లనేలల్లో 150–180 cm ఉంచాలి. మొక్కల మధ్య దూరం 20 cm ఉంచాలి.

ఫంగిసైడ్ శుద్ధి కోసం ఒక కిలో విత్తనానికి 3 గ్రాముల థైరం లేదా కాప్టాన్ వాడాలి. మొదటిసారి కంది సాగు చేస్తున్న పొలాల్లో రైజోబియం కల్చర్‌తో కూడా విత్తన శుద్ధి చేయాలి. ఎకరాకు 200–400 గ్రాముల రైజోబియం కల్చర్ అవసరం.

ఎరువుల విషయంలో ఎకరాకు 8 కిలోల నత్రజని, 20 కిలోల భాస్వరం చివరి దుక్కిలో వేయాలి. విత్తిన 24–48 గంటల లోపు పెండిమిథాలిన్ ప్రీ ఎమర్జెంట్ హెర్బిసైడ్ ఎకరాకు 1.3–1.6 లీటర్లు పిచికారు చేస్తే కలుపు నియంత్రణ సులభమవుతుంది.