ఎల్నినో నేపథ్యంలో కొర్ర సాగుకు ప్రోత్సాహం: శ్రీకాకుళం శాస్త్రవేత్త కిరణ్ కుమార్ సూచనలు

వర్షాలు ఆలస్యం కావడం, తగ్గడం వంటి ఎల్నినో ప్రభావం రాబోయే ఖరీఫ్‌పై ఉండొచ్చని శాస్త్రవేత్తలు హెచ్చరిస్తున్నారు. ఈ నేపథ్యంలో రైతులు తక్కువ నీరు, తక్కువ పెట్టుబడితో పండే చిరుధాన్యాల వైపు మొగ్గు చూపాలని సూచిస్తున్నారు. అందులో కొర్ర ప్రత్యామ్నాయ పంటగా అనువైనదని శ్రీకాకుళం జిల్లా ఆముదాలవలస కృషి విజ్ఞాన కేంద్రం శాస్త్రవేత్త కిరణ్ కుమార్ తెలిపారు.

కొర్ర పంట కాలం కేవలం 3-4 నెలలు మాత్రమే. అన్ని రకాల నేలల్లో సాగు చేసుకోవచ్చు. ఖరీఫ్‌లో జూన్ రెండో వారం నుంచి జూలై చివరి వారం వరకు విత్తనం వేయొచ్చు. ఆలస్యమైతే ఆగస్టు 15 వరకు కూడా విత్తుకోవచ్చు. ఎకరాకు 2 కిలోల విత్తనం సరిపోతుంది. విత్తనాన్ని 22.5 సెం.మీ. వరుసల మధ్య, మొక్కకు మొక్కకు 7.5 సెం.మీ. దూరంలో, 2 సెం.మీ. లోతులోపే విత్తుకోవాలి.

ఎరువుల నిర్వహణ విషయంలో ఎకరాకు 16 కిలోల నత్రజని (28 కిలోల యూరియా), 8 కిలోల భాస్వరం (18 కిలోల డీఏపీ), 8 కిలోల పొటాషియం (13 కిలోల ఎంఓపీ) ఇవ్వాలి. యూరియాను రెండు సమభాగాలుగా చేసి, సగం విత్తనం వేసేటప్పుడు, మిగిలిన సగం 30 రోజుల తర్వాత వేసుకోవాలి. నీటి పారుదల అవసరం తక్కువే అయినా, కంకి బయటకు వచ్చి గింజ నిండే దశలో పంటకు తేలికపాటి నీటి తడులు ఇవ్వాలి.

కలుపు నివారణకు విత్తిన 72 గంటల్లోపు ఐసోప్రొచ్చురన్ 400 గ్రాములను 200 లీటర్ల నీటిలో కలిపి పిచికారి చేయాలి. చెదలు నివారణకు విత్తనం వేసేటప్పుడు ఫిప్రోనిల్ 0.3జీ గుళికలు 7 కిలోలను 20 కిలోల ఇసుకతో కలిపి ఎకరంలో జల్లుకోవాలి. కత్తెర పురుగు, కాండం తొలిచే పురుగు నివారణకు క్లోరాంట్రినిలిప్రోల్ 60 మి.లీ. లేదా స్పైనోసైడ్ 60 మి.లీ.ని 200 లీటర్ల నీటిలో కలిపి పిచికారి చేయాలి. అగ్గితెగులు నియంత్రణకు ట్రైసైక్లోజోల్ 0.6 గ్రాములను లీటరు నీటిలో కలిపి స్ప్రే చేయాలి.