భద్రాద్రి కొత్తగూడెం: మొబైల్ సిగ్నల్ లేమితో గ్రామస్థులకు తీవ్ర ఇబ్బందులు

భద్రాద్రి కొత్తగూడెం జిల్లాలోని ఏజెన్సీ ప్రాంతాల్లో మొబైల్ నెట్వర్క్ సిగ్నల్ కొరత తీవ్రంగా ఉంది. ఈ సమస్యతో గ్రామస్థులు నిత్యం ఇబ్బందులు ఎదుర్కొంటున్నారు.

సెల్ టవర్లు లేకపోవడంతో గ్రామాల్లో ఫోన్ సిగ్నల్ అందడం లేదు. దీంతో చాలామంది కాల్స్ చేయడానికి కొండలెక్కడం, చెట్లపై దారాలకు ఫోన్లు వేలాడదీయడం వంటి చర్యలు చేపడుతున్నారు. సిగ్నల్ కోసం కిలోమీటరు దూరం నడవాల్సి వస్తోందని స్థానికులు చెబుతున్నారు.

ఆన్లైన్ చెల్లింపులు, యూపీఐ లావాదేవీలు, వాట్సాప్, యూట్యూబ్ వినియోగం కష్టంగా మారింది. ఫోన్ పే ద్వారా డబ్బు పంపాలన్నా, పోస్టాఫీసులో పనులు చేయాలన్నా నెట్వర్క్ లేక ఆగిపోతున్నాయని ఓ మహిళా గ్రూపు సభ్యురాలు తెలిపారు.

అత్యవసర సమయంలో అంబులెన్స్కు కాల్ చేయలేక ఇటీవలే ఒకరు ప్రాణాలు కోల్పోయినట్లు గ్రామస్థులు వాపోతున్నారు. చెన్నై, హైదరాబాద్లో ఉద్యోగాలు చేస్తున్న కుటుంబ సభ్యులతో మాట్లాడేందుకు కనీసం కిలోమీటరు దూరం నడిచి రావాల్సిందేనని బాధితులు చెప్పారు.

ప్రభుత్వం ఏర్పాటు చేయదలచిన సెల్ టవర్ల నిర్మాణం ఆలస్యమవుతోంది. రెవెన్యూ అధికారులు స్థల పరిశీలన చేయకపోవడం, అటవీ శాఖ అనుమతులు ఇవ్వకపోవడంతో టవర్ల పని ముందుకు సాగడం లేదని గ్రామస్థులు పేర్కొంటున్నారు. ప్రపంచవ్యాప్తంగా 5G సేవలు విస్తరిస్తున్న తరుణంలో, ఈ గ్రామాల్లో సిగ్నల్ లేమి ప్రజల రోజువారీ జీవితాన్ని తీవ్రంగా ప్రభావితం చేస్తోంది.

గ్రామాల్లో సిగ్నల్ సౌకర్యం కల్పించాలని, సెల్ టవర్ల నిర్మాణానికి అడ్డంకులు తొలగించాలని ప్రజలు కోరుతున్నారు.