విశాఖపట్నంలో కాలుష్య నియంత్రణపై రాజీ లేదు: ఏపీ పీసీబీ ఛైర్మన్

ఆంధ్రప్రదేశ్ కాలుష్య నియంత్రణ మండలి (ఏపీ పీసీబీ) ఛైర్మన్ డాక్టర్ పి. కృష్ణయ్య విశాఖపట్నంలో కాలుష్య నియంత్రణపై ఎలాంటి రాజీకి లేదని స్పష్టం చేశారు. నిబంధనలు ఉల్లంఘిస్తే కఠిన చర్యలు తప్పవని పరిశ్రమల ప్రతినిధులను హెచ్చరించారు.

ఈ మేరకు విశాఖపట్నంలో జిల్లా కలెక్టర్, జాయింట్ కలెక్టర్, పీసీబీ సభ్యులు, స్థానిక ఎమ్మెల్యే, పారిశ్రామిక ప్రతినిధులతో సమీక్షా సమావేశం నిర్వహించారు. సుమారు మూడు గంటల పాటు కాలుష్య సమస్యలపై విస్తృతంగా చర్చించారు.

గత నవంబర్-డిసెంబర్ నెలల్లో విశాఖపట్నంలో వాయు కాలుష్య స్థాయిలు ఒక రోజు ఢిల్లీ స్థాయిని మించిపోయినట్లు అధికారులు గుర్తించారు. దీంతో వెంటనే స్పెషల్ టీమ్స్ ఏర్పాటు చేసి, కాలుష్యం ఎక్కువగా ఉన్న పరిశ్రమల్లో చర్యలు చేపట్టినట్లు ఛైర్మన్ తెలిపారు.

పరిశ్రమల ఏర్పాటుకు 30 శాతం గ్రీన్ కవర్ నిర్వహించాల్సి ఉండగా, ఎక్కడ నిర్వహించాలో స్పష్టత లేదని, రాబోయే మాస్టర్ ప్లాన్లో ఈ దిశగా నిర్దేశాలు ఇస్తామని పేర్కొన్నారు.

విశాఖ పోర్టులో దుమ్ము ధూళి నియంత్రణకు బర్త్ ఆపరేటర్లకు మెకనైజేషన్ డెడ్‌లైన్ ఆరు నెలలు విధించినట్లు వెల్లడించారు. చిన్న ఆపరేటర్లు లేకపోవడంతో కాలుష్యం గణనీయంగా తగ్గుతుందని చెప్పారు.