లక్డీకాపూల్‌లో ఈ నెల 22న వన్-వే ట్రయల్ రన్; మూడు మార్గాల్లో డైవర్షన్

హైదరాబాద్‌లోని లక్డీకాపూల్ కూడలిలో ట్రాఫిక్ ఇబ్బందులను తగ్గించేందుకు ఈ నెల 22న ఒక రోజు పాటు వన్-వే ట్రయల్ రన్ నిర్వహించనున్నారు. రవీంద్ర భరతి–లక్డీకాపూల్–ఇక్బాల్ మినార్ మార్గంలో ఈ ప్రయోగం జరుగుతుంది.

KBR పార్క్ చుట్టూ వన్-వే విధానం మంచి ఫలితాలు ఇచ్చిందని అధికారులు చెప్తున్నారు. దీంతో ఇప్పుడు లక్డీకాపూల్‌పై దృష్టి పెట్టారు. మొదట ప్రయోగాత్మకంగా అమలు చేసి, ఆ తర్వాతే శాశ్వత అమలుపై నిర్ణయం తీసుకుంటారు. ప్రజలకు ఎలాంటి ఇబ్బంది కలగకుండా చూసేలా ఈ ప్రయోగం ఉంటుంది.

ట్రయల్ రన్ సమయంలో మూడు మార్గాల్లో వాహనాలను మళ్లిస్తారు. ఓల్డ్ కంట్రోల్ రూమ్ నుంచి రవీంద్ర భరతి మీదుగా ఇక్బాల్ మినార్ వైపు సెకింద్రాబాద్ వెళ్లే వాహనాలను రవీంద్ర భరతి నుంచి నేరుగా పంపరు. వాటిని పాత సైఫాబాద్ PS, ఇక్బాల్ మినార్, సచివాలయం జంక్షన్ మీదుగా మళ్లిస్తారు.

నిరంకారి జంక్షన్ నుంచి ఓల్డ్ కంట్రోల్ రూమ్ వైపు వెళ్లే వాహనాలు HDFC జంక్షన్ వైపు నేరుగా వెళ్లవు. పాత సైఫాబాద్ PS వద్ద ఇక్బాల్ మినార్ వైపు మళ్లి, కుడివైపు తిరిగి రవీంద్ర భరతి మీదుగా ఓల్డ్ కంట్రోల్ రూమ్ చేరుకుంటాయి. సచివాలయం జంక్షన్, తెలంగాణ తల్లి ఫ్లైఓవర్ నుంచి పాత సైఫాబాద్ PS వైపు వెళ్లే వాహనాలు ఇక్బాల్ మినార్ నుంచి రవీంద్ర భరతి వైపు వెళ్తాయి. ఓల్డ్ కంట్రోల్ రూమ్ వద్ద యూటర్న్ తీసుకుని అసెంబ్లీ గేట్ నంబర్ 3, రవీంద్ర భరతి మీదుగా పాత సైఫాబాద్ PS వైపు వెళ్తాయి.

ట్రయల్ సజావుగా సాగేందుకు GHMC, జలమండలి, విద్యుత్ శాఖతో పాటు ఇతర విభాగాలతో సమన్వయ సమావేశం ఏర్పాటు చేస్తున్నారు. ఈ సమావేశంలోనే తుది నిర్ణయం తీసుకుంటారు.