నిర్మల్‌ జిల్లాలో భూవివాదం: పంట ధ్వంసం, ఉద్రిక్తత

నిర్మల్ జిల్లా దస్తూరాబాద్ మండలం పెర్కపల్లెలో భూవివాదం ఒక్కసారిగా ఉద్రిక్తంగా మారింది. రైతు అచ్చవ్వకు చెందిన పంట పొలంలోకి చొరబడిన మరో వర్గం పంటను ధ్వంసం చేసింది. పశువులను పంపించి నష్టం కలిగించారు.

అచ్చవ్వ కుటుంబం 3 ఎకరాల భూమిలో 50 ఏళ్లుగా వ్యవసాయం చేసుకుంటోంది. అయితే ఆ భూమి పార్వతి లచ్చగౌడికి చెందినదని, మరో వర్గం వాదించింది. ఈ నేపథ్యంలో ఆ వర్గం గతంలో నాటిన వరి పంటను పూర్తిగా ధ్వంసం చేసింది. సంఘటనా స్థలానికి చేరుకున్న పోలీసులు ఘర్షణ జరగకుండా పరిస్థితిని అదుపులోకి తీసుకొచ్చారు.

బాధితురాలు అచ్చవ్వ మాట్లాడుతూ, ఈ భూమిపై తమకు కోర్టు ఉత్తర్వులు, ఆధార పత్రాలు ఉన్నాయని తెలిపారు. కోర్టు ఆదేశాల ప్రకారమే పంట వేశామని, అయినా మరో వర్గం నష్టం చేసిందని ఆమె వాపోయారు. సర్వేయర్ సూచన ప్రకారం తమ భూమి ఎక్కడ ఉందో చూసుకుంటానని, సర్వే చేస్తే తేలిపోతుందని చెప్పారు.

ఇప్పుడు రెవెన్యూ అధికారులు స్పందించి సర్వే నిర్వహించాలని, తమకు న్యాయం జరగాలని బాధిత కుటుంబం డిమాండ్ చేస్తోంది. భూమి ఎవరికి చెందుతుందనేది రెవెన్యూ శాఖ పరిశీలించాల్సి ఉంది. పోలీసులు ఫిర్యాదు స్వీకరించి విచారణ ప్రారంభించే అవకాశం ఉంది.