పాస్పోర్టు పౌరసత్వం వివాదం: ఓవైసీ వ్యాఖ్యలపై బీజేపీ ఎంపీ లక్ష్మణ్ కౌంటర్

బీజేపీ రాజ్యసభ సభ్యుడు లక్ష్మణ్ మాట్లాడుతూ ఎంఐఎం అధ్యక్షుడు అసదుద్దీన్ ఓవైసీ చేసిన పాస్పోర్టు – పౌరసత్వం వ్యాఖ్యలను తప్పుపట్టారు. పాస్పోర్టును పౌరసత్వం ధ్రువీకరణగా పరిగణించలేమని విదేశాంగ శాఖ ఇటీవల చేసిన ప్రకటన కోర్టు ఆదేశాలకు అనుగుణంగా జరిగిందని ఆయన చెప్పారు.

ఈ సందర్భంగా ఓవైసీ చేసిన 'భవిష్యత్తులో బీజేపీ సభ్యత్వం ఉంటేనే పౌరసత్వం ఇస్తారేమో' అన్న వ్యాఖ్యలపై లక్ష్మణ్ స్పందించారు. ఎంఐఎం సభ్యత్వం ఉన్నా సరే ఓటరు జాబితా ప్రక్షాళన ప్రక్రియలో పేర్లు యథావిధిగా నమోదవుతాయని, ఇందులో మార్పు ఉండదని ఆయన అన్నారు.

ఓటరు జాబితా ప్రక్షాళన (ఎస్ఐఆర్) అనేది రాజ్యాంగ బద్ధమైన, చట్టబద్ధమైన ప్రక్రియ అని లక్ష్మణ్ పేర్కొన్నారు. డూప్లికేట్, చనిపోయిన వారి, దొంగ ఓట్లను తొలగించి, కొత్తగా 18 ఏళ్లు నిండిన యువత ఓటరుగా నమోదు కావడమే లక్ష్యమని చెప్పారు. ఈ ప్రక్రియను కాంగ్రెస్, బీఆర్ఎస్ పార్టీలు అడ్డుకుంటున్నాయని ఆరోపించారు.

రాష్ట్రంలో కాంగ్రెస్ ప్రభుత్వం అవినీతి మయమైందని, బీఆర్ఎస్ పాలనపై ప్రజలు విసిగిపోయారని లక్ష్మణ్ విమర్శించారు. అందుకే ప్రజలు మార్పు కోరుకుంటున్నారని, రాబోయే ఎన్నికల్లో బీజేపీ బలంగా నిలుస్తుందని ధీమా వ్యక్తం చేశారు. తెలంగాణలో 2029 నాటికి మహిళా రిజర్వేషన్లతో, నియోజకవర్గాల పునర్విభజనతో ఎన్నికలు జరుగుతాయని, జెమిలీ ఎన్నికలు కూడా జరిగే అవకాశం ఉందని అన్నారు.