షోయబ్ అక్తర్ సోదరుడి అంత్యక్రియల్లో లష్కర్ టెర్రరిస్టులు; Republic రిపోర్ట్

పాకిస్థాన్ మాజీ ఫాస్ట్ బౌలర్ షోయబ్ అక్తర్ సోదరుడు షాహిద్ అక్తర్ అంత్యక్రియల్లో లష్కరే టాయిబా టెర్రరిస్టులు పాల్గొన్నట్లు Republic World నివేదిక వెల్లడించింది. ఈ అంత్యక్రియల ఎక్స్‌క్లూజివ్ వీడియోలు Republic కి లభించాయని ఆ సంస్థ తెలిపింది.

ఇస్లామాబాద్‌లో జరిగిన ఈ అంత్యక్రియల్లో లష్కరే టాయిబా రాజకీయ విభాగం పాకిస్థాన్ మార్కజీ ముస్లిం లీగ్ (PMML) అధ్యక్షుడు ఇనామ్ ఉల్ రెహమాన్ కాంబోహ్ పాల్గొన్నట్లు Republic వీడియోలో స్పష్టంగా కనిపించింది. షోయబ్ అక్తర్ స్వయంగా ఈ టెర్రరిస్ట్ పక్కనే నిలబడి ఉన్నట్లు దృశ్యాలు చూపిస్తున్నాయి.

ఇనామ్ ఉల్ రెహమాన్ 2019 పుల్వామా దాడి మాస్టర్ మైండ్‌గా గుర్తించబడిన సైఫుల్లా ఖాసూరీతో సన్నిహిత సంబంధాలు కలిగి ఉన్నట్లు నివేదికలు చెబుతున్నాయి. లష్కరే టాయిబా డిప్యూటీ చీఫ్‌గా ఉన్న ఖాసూరీతో ఇనామ్ అనేకసార్లు కలిసి ఫొటోలు దిగినట్లు తెలుస్తోంది.

ఈ అంత్యక్రియల్లో PMML డిప్యూటీ సెక్రటరీ జనరల్ అబ్దుల్ తూర్, జోనల్ జనరల్ సెక్రటరీ హాఫిజ్ ఉమర్, ఖిద్మత్ కమిటీ చైర్మన్ అమ్జద్ భట్టితో సహా పలువురు లష్కరే టాయిబా అనుబంధ నేతలు హాజరైనట్లు గుర్తించారు. ఈ వీడియోను PMML అధికారికంగా విడుదల చేసినట్లు Republic పేర్కొంది.

పాకిస్థాన్‌లో టెర్రరిస్టులు, ప్రభుత్వ అధికారులు, సెలబ్రిటీలు, క్రీడాకారులు అందరూ కలిసిపోయారనడానికి ఈ ఘటన నిదర్శనమని Republic తన నివేదికలో పేర్కొంది. షోయబ్ అక్తర్ సోదరుడి అంత్యక్రియలకు నిషేధిత సంస్థ నేతలను ఎలా అనుమతించారని పాకిస్థాన్ అంతర్జాతీయ సమాజానికి సమాధానం చెప్పాలని Republic డిమాండ్ చేసింది.