ఉత్తరాఖండ్‌లోని మధ్యమహేశ్వర్ ఆలయం.. పంచకేదార క్షేత్రాల్లో ఒకటి

ఉత్తరాఖండ్ రాష్ట్రంలోని రుద్రప్రయాగ్ జిల్లాలో మధ్యమహేశ్వర్ ఆలయం ఉంది. హిమాలయాల్లో సముద్ర మట్టానికి 3,497 మీటర్ల ఎత్తులో ఈ ఆలయం కొలువైంది. ఇది పంచకేదార క్షేత్రాల్లో ఒకటి.

ఇక్కడ శివుడి మధ్య భాగం అంటే నాభిని పూజిస్తారు. ఆలయం కేదార్‌నాథ్ పర్వతాల వైపు చూస్తూ ఉంటుంది. పచ్చని అడవులు, జలపాతాలు, నదులు, మంచుతో నిండిన శిఖరాల మధ్య ఈ ప్రాంతం ప్రశాంతంగా ఉంటుంది. ఇక్కడి నుంచి చౌకంబా సహా ఎత్తైన శిఖరాల దృశ్యాలను చూడవచ్చు.

పంచకేదార ఆలయాల్లో కేదార్‌నాథ్, మధ్యమహేశ్వర్, తుంగనాథ్, రుద్రనాథ్, కల్పేశ్వర్ ఉన్నాయి. ఇవన్నీ శివుడి ఆలయాలే. యాత్రికులు ఈ ఐదు ఆలయాలను దర్శించుకుంటారు. ఈ ఆలయాలను పాండవులు నిర్మించారని ప్రచారంలో ఉన్న కథనం చెబుతోంది.

మహాభారత యుద్ధం తర్వాత కృష్ణుడి సలహా మేరకు పాప విముక్తి కోసం పాండవులు శివుడిని వెతుక్కుంటూ వచ్చారని ఆ కథనం చెబుతోంది. యుద్ధ వినాశనానికి కలత చెందిన శివుడు ఎద్దు రూపంలో వారికి కనిపించకుండా తిరిగాడని అంటారు. భీముడు ఆయన్ని గుర్తించి వెంటపడ్డాడని కథనం. దాంతో శివుడు తన శరీరాన్ని ఐదు భాగాలుగా విభజించాడని ప్రచారం ఉంది. కల్పేశ్వర్ వద్ద ముఖం, రుద్రనాథ్ వద్ద మొండెం, మధ్యమహేశ్వర్ వద్ద మూపురం, కేదార్‌నాథ్ వద్ద కాళ్లు పడ్డాయని భక్తులు చెబుతుంటారు. ఆ ఐదు ప్రాంతాల్లో ఆలయాలు నిర్మించినట్టు కథనం ఉంది.

మధ్యమహేశ్వర్‌కు వెళ్లాలంటే ముందు డెహరాడూన్‌లోని జాలీ గ్రాంట్ విమానాశ్రయానికి చేరుకోవాలి. అక్కడి నుంచి కారులో వెళ్లవచ్చు. లేదా హరిద్వార్ వరకు రైలులో వెళ్లి, అక్కడి నుంచి ఊకీమఠ్ చేరుకోవచ్చు. ఊకీమఠ్ నుంచి రాన్సీ చేరుకున్నాక ఆలయం వరకు 16 కిలోమీటర్లు ట్రెక్కింగ్ చేయాలి. నడవలేని వారి కోసం గుర్రాలు, డోలీలు ఉంటాయి. బంటోలి నుంచి ట్రెక్కింగ్ కొంచెం కష్టంగా ఉంటుంది. రాన్సీలో హోటళ్లు ఉన్నాయి.

ఆలయం వద్ద రెస్ట్ రూమ్‌లు, భోజన సౌకర్యం స్థానికులు ఏర్పాటు చేస్తారు. ఆరోగ్య సమస్యలు ఉన్నవారు, నడక అలవాటు లేనివారు కొంత ఇబ్బంది పడవచ్చు. ఫిట్‌నెస్ ఉన్నవారు సులభంగా చేరుకోవచ్చు. వాతావరణం, నడిచే వేగాన్ని బట్టి రెండు మూడు రోజుల్లో ఆలయానికి చేరుకోవచ్చు.