నాసిక్ త్రయంబకేశ్వర్ సింహస్థ కుంభమేళ ప్రారంభం.. రాష్ట్రపతి ముఖ్య అతిథి

నాసిక్ త్రయంబకేశ్వర్ సింహస్థ కుంభమేళ శనివారం అధికారికంగా ప్రారంభమవుతోంది. రామకుండ్ సమీపంలో మధ్యాహ్నం 12 గంటలకు ధ్వజారోహణ వేడుక జరుగుతుంది. ఈ వేడుకతో కుంభమేళ ప్రారంభమైనట్టు భావిస్తారు. రాష్ట్రపతి ద్రౌపది ముర్ము ఈ కార్యక్రమానికి ముఖ్య అతిథిగా హాజరవుతారు.

నాసిక్, త్రయంబకేశ్వర్ పంచవటి ప్రాంతంలో కుంభమేళను సంయుక్తంగా నిర్వహిస్తున్నారు. ఇందులో 13 ప్రధాన అఖాడాలు పాల్గొంటున్నాయి. ఈసారి మూడు అమృత స్నానాలు, 45 కుంభ స్నానాలు ఉంటాయి. గోదావరి నది ప్రక్షాళన కార్యక్రమం కొనసాగుతోంది. తపోవన్‌లో భక్తుల కోసం ప్రత్యేక ఏర్పాట్లు చేశారు.

ఈ కుంభమేళ 21 నెలల పాటు కొనసాగుతుంది. 2028 జూలైలో ముగుస్తుంది. ప్రయాగ్రాజ్, హరిద్వార్‌లతో పోలిస్తే ఇక్కడి స్థలం చాలా తక్కువ అని అధికారులు గుర్తించారు. ప్రయాగ్రాజ్‌లో 10 వేల ఎకరాలు అందుబాటులో ఉండగా, నాసిక్‌లోని సాధుగ్రామ్ ప్రాంతం 350 ఎకరాలే. రామకుండ్ ఘాట్ 100 ఎకరాల విస్తీర్ణంలో ఉంది.

రద్దీ నిర్వహణ కోసం మహారాష్ట్ర ప్రభుత్వం భారీ ఏర్పాట్లు చేస్తోంది. భక్తులకు ఎక్కువ సమయం ఉంటే వారు వేరు వేరు సమయాల్లో వస్తారని నిర్వాహకులు భావిస్తున్నారు. దీని వల్ల జన సమూహ నిర్వహణ మరింత మెరుగవుతుందని వారి అంచనా.