ఢిల్లీ టీటీడీ ఆలయంలో తొలిసారి పవిత్రోత్సవాలు ప్రారంభం

న్యూఢిల్లీలోని టీటీడీ శ్రీ వెంకటేశ్వర స్వామి ఆలయంలో వార్షిక పవిత్రోత్సవాలు ప్రారంభమయ్యాయి. ఈ ఆలయంలో పవిత్రోత్సవాలు నిర్వహించడం ఇదే తొలిసారి.

ఉత్సవాల్లో భాగంగా అర్చకులు శాస్త్రోక్తంగా అంకురార్పణ కార్యక్రమాన్ని నిర్వహించారు. ఈ కార్యక్రమంలో ఢిల్లీ ఉపముఖ్యమంత్రి పర్వేశ్ వర్మ, BJP జాతీయ ప్రధాన కార్యదర్శి బీఎల్ సంతోష్, ఆలయ చైర్మన్ సుమంత్ రెడ్డి పాల్గొన్నారు.

ఉత్సవాలు నవంబర్ 1 వరకు నాలుగు రోజుల పాటు జరుగుతాయి. తొలి రోజు పవిత్ర ప్రతిష్ట, స్నపన తిరుమంజనం నిర్వహించారు. అక్టోబర్ 31న పవిత్ర సమర్పణ జరుగుతుంది. నవంబర్ 1న మహా పూర్ణాహుతి, చక్రస్నానం నిర్వహిస్తారు. చివరి రోజు సాయంత్రం స్వామివారి తిరుచి ఉత్సవం నాలుగు మాడవీధుల్లో జరుగుతుంది.

ఆలయంలో నిత్యం జరిగే అర్చనలు, ఆర్జిత సేవలు, వారోత్సవాలు, పక్షోత్సవాలు, మాసోత్సవాలు, బ్రహ్మోత్సవాల్లో తెలిసి తెలియక జరిగే దోషాల నివారణ కోసం ఈ ఉత్సవాలు జరుగుతాయి. యాగశాలలో ఆగమ శాస్త్రం ప్రకారం వైదిక కార్యక్రమాలు, విశేష హోమాలు, పవిత్ర సమర్పణ, పూర్ణాహుతి తదితర క్రతువులు నిర్వహిస్తారు.

గత 12 ఏళ్లుగా ఈ ఆలయంలో బ్రహ్మోత్సవాలు నిర్వహిస్తున్న టీటీడీ బోర్డు ఈ ఏడాది పవిత్రోత్సవాలను ప్రారంభించింది.