బంతిపూల సాగు: రైతులకు అధిక దిగుబడి, మంచి ఆదాయం కోసం విశాఖ వ్యవసాయ పరిశోధన స్థానం సూచనలు

విశాఖపట్నం జిల్లా చింతపల్లిలోని ప్రాంతీయ వ్యవసాయ పరిశోధన స్థానం శాస్త్రవేత్తలు బంతిపూల సాగుపై రైతులకు ఉపయోగకర సూచనలు ఇచ్చారు. బంతి మార్కెట్లో ఎప్పుడూ గిరాకి ఉండి, చిన్నకారు రైతులకు లాభదాయకంగా ఉంటుందని వారు తెలిపారు.

ఈ సందర్భంగా శాస్త్రవేత్త సందీప్ నాయక్ మాట్లాడుతూ, ఏజెన్సీ ప్రాంతాల్లో ఫ్రెంచ్, ఆఫ్రికన్, స్థానిక కాటుకు బంతి రకాలు విస్తృతంగా సాగు చేస్తున్నారన్నారు. ఆంధ్రప్రదేశ్‌లో మొత్తం 9,540 హెక్టార్లలో బంతి సాగు జరుగుతుండగా, ఏజెన్సీ ఏరియాలో 140 హెక్టార్లు ఉంది.

అధిక దిగుబడి కోసం మొక్కకు మొక్కకు 20 సెంటీమీటర్లు, వరుసకు వరుసకు 40 సెంటీమీటర్ల దూరం పాటించాలి. జూలై చివరి వారంలో నారు నాటితే అక్టోబర్‌లో, అలాగే అక్టోబర్-నవంబర్‌లో నాటితే ఫిబ్రవరి-మార్చి‌లో పూల దిగుబడి వస్తుంది. 45 రోజులకు పై తొడిమ తొలగించే పించింగ్ విధానం చేపడితే మొక్కలు ఒత్తుగా పెరిగి ఎక్కువ పూలు తెస్తాయి.

విత్తన మోతాదు ఎకరానికి 800-1000 గ్రాములు సరిపోతుంది. చీడపీడల నివారణకు వేపనూనె 5 మిల్లీలీటర్లు లీటర్ నీటికి కలిపి 10వ, 15వ రోజున పిచికారీ చేయాలి. సూడోమోనాస్ 2 గ్రాములు లీటర్ నీటికి పిచికారీ చేస్తే ఆకుమచ్చ తెగులు రాకుండా ఉంటుంది. ఎకరానికి 5 టన్నుల పశువుల ఎరువు వేస్తే మంచి దిగుబడి లభిస్తుంది.

బంతిని ప్రధాన పంటగా కాకుండా, మొక్కజొన్న, పసుపు వంటి దీర్ఘకాలిక పంటల్లో అంతర పంటగా వేస్తే కీటకాలను తరిమివేసే గుణం ఉంటుంది. డిసెంబర్-నవంబర్ కాలంలో కేజీ 50-70 రూపాయల చొప్పున ఆదాయం వస్తుంది. ఎకరానికి సుమారు 35,000-45,000 మొక్కల నుంచి 2-5 క్వింటాళ్ల దిగుబడి సాధించి, రూ.3 లక్షల వరకు ఆదాయం పొందవచ్చని శాస్త్రవేత్త తెలిపారు. రైతులు సరైన యాజమాన్య పద్ధతులు పాటించి, పరిశోధన స్థానాన్ని సంప్రదించి సూచనలు తీసుకోవాలని కోరారు.