వైద్యం-చదరంగం సమతూకం: జాతీయ, అంతర్జాతీయ పతకాలు సాధిస్తున్న సాయి దివ్య

గుంటూరుకు చెందిన సాయి దివ్య MBBS చదువుతూనే చెస్‌లో జాతీయ, అంతర్జాతీయ స్థాయిలో రాణిస్తోంది. తండ్రి శివప్రసాద్ ఇంజనీర్, తల్లి వెంకటలక్ష్మి కుమారి గృహిణి.

ఐదో తరగతిలో తండ్రి ఆడటం చూసి ఈ ఆటపై ఆసక్తి పెంచుకుంది. తల్లిదండ్రుల ప్రోత్సాహంతో ప్రత్యేక శిక్షణ పొంది, రెండేళ్లలోనే జాతీయ పతకాలు సాధించడం మొదలు పెట్టింది.

2016లో జాతీయ పోటీల్లో స్వర్ణ, రజత పతకాలు సాధించిన ఆమె, అప్పటి ముఖ్యమంత్రి చంద్రబాబునాయుడు చేతుల మీదుగా క్రీడా భారతి అవార్డు అందుకుంది. 2020 నాటికి అండర్-16 ఆసియా చెస్‌లో రెండుసార్లు భారత్ తరపున ప్రాతినిధ్యం వహించింది. ఇటీవల ప్రపంచ ఛాంపియన్ దివ్య దేశ్‌ముఖ్‌తో ఆడి డ్రా చేయడం తన కెరీర్‌లో అత్యుత్తమ గేమ్‌గా చెప్పింది.

2022లో విజయవాడ సిద్ధార్థ వైద్య కళాశాలలో MBBS సీటు సంపాదించిన సాయి దివ్య, గత మూడేళ్లలో ఏ పరీక్షా ఫెయిల్ కాకుండా ఫస్ట్ క్లాస్‌లో ఉత్తీర్ణత సాధిస్తోంది. 65వ విశ్వవిద్యాలయాల స్థాయి పోటీల్లో ఆరో స్థానం సంపాదించింది. విజ్ఞాన్, SRM, BITS వంటి విశ్వవిద్యాలయాల టోర్నమెంట్లలో పాల్గొని ప్రిన్సిపాల్ ప్రత్యేక అభినందనలు అందుకుంది.

కళాశాల యాజమాన్యం ప్రతి సంవత్సరం ఆమెను ప్రత్యేక షీల్డ్‌తో సత్కరించడంతో పాటు, బెస్ట్ అవుట్‌గోయింగ్ స్టూడెంట్‌గా గుర్తించింది. సరైన ప్రోత్సాహం లభిస్తే మరిన్ని విజయాలు సాధించగలనని సాయి దివ్య చెప్తోంది.