నల్గొండ జిల్లా మిర్యాలగూడలో రెండు వర్గాల మధ్య కత్తులతో దాడి, పలువురికి గాయాలు

నల్గొండ జిల్లా మిర్యాలగూడలో శుక్రవారం అర్ధరాత్రి రెండు వర్గాల యువకులు ఘర్షణ పడి కత్తులతో దాడి చేసుకున్నారు. ఈ ఘటన మిర్యాలగూడ హైవేపై జరిగింది.

దాడిలో పలువురు తీవ్రంగా గాయపడ్డారు. గాయపడిన వారు రక్తపు మరకలతో కూడిన దుస్తులతో రోడ్డుపై హింసాత్మకంగా ప్రవర్తించినట్లు తెలుస్తోంది. ఈ ఘర్షణ కారణంగా స్థానికులు భయాందోళనకు గురయ్యారు. కొంతమంది స్థానికులు 100 నంబర్‌కు ఫోన్ చేసి పోలీసులకు సమాచారం ఇచ్చారు.

సంఘటన స్థలానికి చేరుకున్న పోలీసులు ఇరు వర్గాల యువకులను చెదరగొట్టి పరిస్థితిని అదుపులోకి తీసుకువచ్చారు. గాయపడిన వారిని సమీపంలోని ఆస్పత్రికి తరలించారు. ఈ దాడులకు పాత కక్షలు కారణమా లేక యువకులు మద్యం మత్తులో ఉన్నారా అనే కారణాలపై పోలీసులు విచారణ చేస్తున్నారు.

రాత్రివేళ పోలీసు పెట్రోలింగ్ లేకపోవడం వల్లే ఇటువంటి సంఘటనలు జరుగుతున్నాయని స్థానికులు ఆరోపిస్తున్నారు. అలాంటి పోకిరీలపై కఠిన చర్యలు తీసుకోవాలని వారు డిమాండ్ చేశారు.