సీషెల్స్ విలువైన సముద్ర పొరుగు దేశం: మూడు రోజుల పర్యటన ముందు ప్రధాని మోదీ

ప్రధాని నరేంద్ర మోదీ సీషెల్స్‌ను భారత విజన్ మహాసాగర్ (సాగర్) కార్యక్రమంలో కీలక భాగస్వామిగా పేర్కొన్నారు. ఆ దేశాన్ని విలువైన సముద్ర ప్రాంత పొరుగు దేశంగా అభివర్ణించారు.

మూడు రోజుల అధికారిక పర్యటన కోసం సీషెల్స్‌కు బయలుదేరే ముందు ప్రధాని ఎక్స్ వేదికగా ఈ వ్యాఖ్యలు చేశారు. ఇరు దేశాల మధ్య ఉన్న సుదీర్ఘ మైత్రిని మరింత బలోపేతం చేసే దిశగా ద్వైపాక్షిక చర్చలు జరుగుతాయని తెలిపారు.

భారతదేశం-సీషెల్స్ మధ్య దౌత్య సంబంధాలు ఏర్పడి ఈ ఏడాదితో 50 ఏళ్లు పూర్తవుతున్నాయని ప్రధాని మోదీ ఈ సందర్భంగా గుర్తుచేశారు. రెండు దేశాలూ పంచుకునే ప్రజాస్వామ్య విలువలు, పరస్పర విశ్వాసం, వైవిధ్యం పట్ల గౌరవం, ప్రజల మధ్య లోతైన అనుబంధం వంటి అంశాలు దృఢమైన ద్వైపాక్షిక బంధానికి పునాది అని ఆయన పేర్కొన్నారు.

సీషెల్స్ అధ్యక్షుడు వావెల్ రామ్ కలవాన్ ఆహ్వానం మేరకు ప్రధాని నేటి నుంచి మూడు రోజుల పాటు ఆ దేశంలో పర్యటిస్తారు. సీషెల్స్ జాతీయ దినోత్సవ స్వర్ణోత్సవ కార్యక్రమాలతో పాటు, ఆ దేశ జాతీయ అసెంబ్లీని ఉద్దేశించి ఆయన ప్రసంగిస్తారు. ఈ గౌరవం పొందిన తొలి భారత ప్రధానమంత్రిగా మోదీ నిలువనున్నారు.