ముంబై లోకల్ రైల్లో తలుపు మూయడంపై వాదన.. సేల్స్‌మ్యాన్‌పై కత్తితో దాడి, మృతి

ముంబై లోకల్ రైల్లో ప్రయాణికుడిపై కత్తితో దాడి జరిగి ఓ సేల్స్‌మ్యాన్ మృతి చెందిన ఘటన సోమవారం రాత్రి వెలుగులోకి వచ్చింది. విరార్‌లో నివసించే మయాంక్ లోహార్ (25) అంధేరిలోని వెస్ట్‌సైడ్‌లో సేల్స్‌మ్యాన్‌గా పనిచేస్తూ ప్రతిరోజూ విరార్-అంధేరి మార్గంలో ప్రయాణించేవాడు. సోమవారం రాత్రి 10 గంటల సమయంలో భారీ వర్షం కారణంగా నీరు రైలు లోపలికి రాకుండా ఉండేందుకు మయాంక్ ఫస్ట్‌క్లాస్ కోచ్‌లో తలుపు మూయాలని మరో ప్రయాణికుడిని కోరాడు. ఈ స్వల్ప విషయమే ఘర్షణకు దారితీసింది. మాటామాటా పెరిగి ఇద్దరి మధ్యా వాగ్వాదం జరిగింది. అకస్మాత్తుగా నిందితుడు తన దగ్గరున్న పదునైన ఆయుధంతో (కత్తి) మయాంక్‌పై దాడి చేశాడు. ఛాతీ, మెడపై బహుళ గాయాలు కావడంతో మయాంక్ అక్కడికక్కడే మృతి చెందాడు. దాడి అనంతరం నిందితుడు రైలు దిగి పారిపోయాడు. ఈ ఘటన సీసీటీవీ కెమెరాల్లో రికార్డయ్యింది. బోరివలి రైల్వే పోలీసులు (GRP) హత్య కేసు నమోదు చేసి దర్యాప్తు ప్రారంభించారు. నిందితుడి ఆచూకీ కోసం ప్రత్యేక బృందాలు గాలిస్తున్నాయి. సంఘటన సమయంలో కోచ్‌లో ఉన్న ఇతర ప్రయాణికులు కూడా షాక్‌కు గురయ్యారు. పోలీసులు వారి వాంగ్మూలాలు నమోదు చేశారు. నిందితుడు మద్యం సేవించాడా లేదా అనే విషయంపై స్పష్టత రావాల్సి ఉందని, అతడిని అరెస్టు చేసిన తర్వాతే వివరాలు తెలుస్తాయని GRP అధికారులు తెలిపారు. ఇదే మార్గంలో దాదాపు మూడు నాలుగు నెలల కిందట ఇలాంటి ఘటనే జరగగా, అప్పటి నిందితుడిని వెంటనే పట్టుకున్నట్లు పోలీసులు గుర్తు చేశారు. ప్రస్తుత కేసులోనూ త్వరలోనే నిందితుడిని పట్టుకుంటామని ధీమా వ్యక్తం చేశారు.