మునేరు వరదలతో NTR జిల్లాలో పంట నష్టం; శాశ్వత పరిష్కారం కోరుతున్న రైతులు

ఎన్టీఆర్ జిల్లాలో మునేరు నదికి వరదలు రావడంతో జగ్గయ్యపేట, నందిగామ నియోజకవర్గాల్లోని వేలాది ఎకరాల పంటలు దెబ్బతిన్నాయి. తెలంగాణలోని వరంగల్ జిల్లా నుంచి ప్రవహించే మునేరు వాగు ఎన్టీఆర్ జిల్లా మీదుగా సాగుతుంది.

వత్సవాయ మండలం ఆల్లూరుపాడు, పాతవేమవరం, పెనుగంచుప్రోలు, ముచ్చింతల, అనిగల్లపాడు, గుమిడిదుర్రు ప్రాంతాల్లో దాదాపు 5,000 ఎకరాల్లో పంటలకు నష్టం వాటిల్లింది. వరద నీరు పొలాల్లో ఇసుక మేటలు వేయడంతో ఎకరానికి రూ.50 వేల నుంచి రూ.లక్ష వరకు అదనపు ఖర్చు అవుతోందని రైతులు చెబుతున్నారు.

వరదల కారణంగా వందలాది విద్యుత్ స్తంభాలు, ట్రాన్స్‌ఫార్మర్లు, మోటార్లు పనికిరాకుండా పోయాయి. రోడ్లు కొట్టుకుపోయాయి. ఇళ్లల్లోకి నీరు చేరడంతో జనజీవనం అస్తవ్యస్తమైంది. 1969, 1976, 1989, 2005, 2024 సంవత్సరాల్లో వచ్చిన వరదల ప్రతిసారీ ఇదే పరిస్థితి ఎదురైంది.

2024లో వచ్చిన వరదలతో తువ్వ కాలువకు పడిన గండ్ల వల్ల 1,000 ఎకరాల్లో పంట నష్టం జరిగింది. ఇసుక మేటలను తొలగించినా రెండేళ్ల పాటు సాగుకు వీలుండదని రైతులు ఆందోళన వ్యక్తం చేస్తున్నారు.

ఈ సమస్యకు శాశ్వత పరిష్కారంగా మునేరు వాగుకు సుమారు కిలోమీటర్ మేర రక్షణ గోడ నిర్మించాలని రైతులు ప్రభుత్వాన్ని, జలవనరుల శాఖ అధికారులను కోరుతున్నారు. ప్రతి 15-20 ఏళ్లకు ఒకసారి వచ్చే వరదలతో తమ పొలాలు దెబ్బతినకుండా కాపాడాలని వారు డిమాండ్ చేస్తున్నారు.