నల్గొండలో డ్రగ్ వ్యతిరేక ర్యాలీ, రన్‌లో కలెక్టర్, ఎస్పీ భాగస్వామ్యం

నల్గొండలో అంతర్జాతీయ మాదక ద్రవ్యాల వ్యతిరేక దినోత్సవం సందర్భంగా యాంటీ డ్రగ్ ర్యాలీ, రన్ నిర్వహించారు. పోలీస్ శాఖ, మహిళా శిశు సంక్షేమ శాఖ సంయుక్తంగా ఈ కార్యక్రమం చేపట్టాయి.

ఎన్జీ కాలేజీ నుంచి క్లాక్ టవర్ వరకు సాగిన ర్యాలీలో విద్యార్థులు, వాకర్‌స్ అసోసియేషన్లు, వివిధ రంగాల ప్రతినిధులు పాల్గొన్నారు. జిల్లా కలెక్టర్ చంద్రశేఖర్, ఎస్పీ శరత్ చంద్ర పవార్ ఈ కార్యక్రమంలో పాల్గొని ప్రసంగించారు.

కలెక్టర్ చంద్రశేఖర్ మాట్లాడుతూ మాదక ద్రవ్యాల నిర్మూలనకు సమాజమంతా కలిసి రావాలని పిలుపునిచ్చారు. డ్రగ్స్ వినియోగం, అక్రమ రవాణాపై సమాచారం ఉంటే పోలీసులకు తెలియజేయాలని ఎస్పీ విజ్ఞప్తి చేశారు. సమాచారం గోప్యంగా ఉంచుతామని, నిందితులపై కేసులు నమోదు చేయడంతోపాటు రిహాబిలిటేషన్‌కు పంపుతామని తెలిపారు.

ర్యాలీ ద్వారా ఫిట్‌నెస్ వైపు దృష్టి సారించాలని, డ్రగ్స్, ఆల్కహాల్, సిగరెట్లకు దూరంగా ఉండాలని నిర్వాహకులు సందేశం ఇచ్చారు. నల్గొండ జిల్లాలో ఇప్పటికే అనేక డ్రగ్ కేసులు నమోదు చేశామని, పలువురిని రిహాబిలిటేషన్‌కు పంపించామని అధికారులు తెలిపారు. డ్రగ్స్‌పై ప్రభుత్వం ‘సే నో టు డ్రగ్స్’ క్యాంపెయిన్‌ను ప్రత్యేక వారంగా నిర్వహిస్తోంది.