దేశవ్యాప్తంగా నేడు నీట్ రీ-ఎగ్జామ్; 22.79 లక్షల మంది విద్యార్థులు హాజరు

నీట్ రీ-ఎగ్జామ్ ఈ రోజు దేశవ్యాప్తంగా 551 నగరాల్లో, 14 దేశాల్లోని నగరాల్లో జరుగుతోంది. మొత్తం 22,79,000 మంది విద్యార్థులు ఈ పరీక్ష రాస్తున్నారు. గతంలో ప్రశ్నపత్రం లీక్ కారణంగా పరీక్ష రద్దు చేశారు. ఈ నేపథ్యంలో ఎన్టీఏ (NTA) విస్తృత భద్రతా చర్యలతో రీ-ఎగ్జామ్ నిర్వహిస్తోంది.

పరీక్ష మధ్యాహ్నం 2 నుంచి సాయంత్రం 5:15 వరకు పెన్-పేపర్ మోడ్‌లో జరుగుతుంది. దివ్యాంగులకు 6:20 వరకు అదనపు సమయం ఇచ్చారు. విద్యార్థులు ఉదయం 11 నుంచి 1:00 గంటల మధ్య కేంద్రానికి చేరుకోవాలి. 1:30 తర్వాత గేట్లు మూసేస్తారని అధికారులు ప్రకటించారు.

భద్రత కోసం అన్ని కేంద్రాల్లో సీసీటీవీ నిఘా, ఆధార్ బేస్డ్ బయోమెట్రిక్ ధృవీకరణ, హై-సెన్సిటివిటీ మెటల్ డిటెక్టర్లు ఏర్పాటు చేశారు. ప్రశ్నపత్రాల తరలింపును జీపీఎస్ ట్రాకింగ్, పోలీసు ఎస్కార్ట్‌తో చేపట్టారు. దేశవ్యాప్తంగా 2 లక్షల మంది పోలీసు, జిల్లా సిబ్బందిని పరీక్ష విధులకు కేటాయించారు. అలాగే ప్రతి కేంద్రాన్ని సెంట్రలైజ్డ్ కమాండ్ కంట్రోల్ రూమ్‌కు అనుసంధానించి నిరంతరం పర్యవేక్షిస్తున్నారు.

విద్యార్థులు సెల్ ఫోన్లు, స్మార్ట్ వాచ్, బ్లూటూత్ వంటి ఎలాంటి ఎలక్ట్రానిక్ పరికరాలు తీసుకురావడానికి అనుమతి లేదు. విద్యుత్ కోతలు ఉండే ప్రాంతాల్లో బ్యాకప్ పవర్, తాగునీరు, అత్యవసర వైద్య సదుపాయాలు అందుబాటులో ఉంచారు. ప్రశ్నపత్రాల లీకేజీ తర్వాత ఈసారి అన్ని లోపాలను సరిదిద్ది పకడ్బందీగా పరీక్ష నిర్వహించడానికి ఎన్టీఏ సిద్ధమైంది.