NEET UG పునఃపరీక్ష ఫలితాలు విడుదల; 17 మంది 705+ మార్కులతో టాపర్స్

నీట్ యూజీ పునఃపరీక్ష ఫలితాలను నేషనల్ టెస్టింగ్ ఏజెన్సీ (NTA) విడుదల చేసింది. దేశవ్యాప్తంగా సుమారు 20 లక్షల మంది విద్యార్థులు ఈ పరీక్ష రాశారు. వీరిలో 12.21 లక్షల మంది ఉత్తీర్ణత సాధించారు.

పరీక్ష ఫలితాల్లో బాలికలదే పైచేయి. మొత్తం ఉత్తీర్ణుల్లో 58 శాతం మంది మహిళా అభ్యర్థులు. 720 మార్కులకు గాను 705 కంటే ఎక్కువ మార్కులు సాధించిన 17 మంది విద్యార్థులు టాపర్లుగా నిలిచారు. అత్యధికంగా 715 మార్కులు సాధించిన పంజాబ్‌కు చెందిన ఆర్యన్ గుప్తా, హర్యాణాకు చెందిన పన్షుల్ బన్సల్ సంయుక్తంగా అగ్రస్థానంలో నిలిచారు. టాపర్లలో ఎక్కువ మంది 17 నుంచి 19 ఏళ్ల వయసువారు.

మార్కుల వారీగా చూస్తే, 650 కంటే ఎక్కువ మార్కులు 1,492 మందికి, 600 పైగా మార్కులు 10,160 మందికి, 500 కంటే ఎక్కువ మార్కులు 90,780 మందికి వచ్చాయి. దేశంలోని 66 నగరాల నుంచి 138 మంది టాప్ ర్యాంకులు సాధించారు.

కేటగిరీల వారీగా ఉత్తీర్ణుల సంఖ్య: జనరల్‌లో 2.91 లక్షలు, ఓబీసీ ఎన్సీఎల్‌లో 5.12 లక్షలు, ఎస్సీలో 1.59 లక్షలు, ఎస్టీలో 63,716, జనరల్ ఈడబ్ల్యూఎస్‌లో 95,026, దివ్యాంగుల కేటగిరీలో 366 మంది అర్హత సాధించారు.

ఈ ఏడాది మేలో జరిగిన నీట్ పరీక్ష ప్రశ్నాపత్రం లీక్ కావడంతో NTA జూన్ 21న పునఃపరీక్ష నిర్వహించింది. జూలై 13న ఓఎంఆర్ షీట్లు విడుదల చేసి, 15వ తేదీ వరకు అభ్యంతరాలు స్వీకరించిన అధికారులు తుది కీని వెబ్‌సైట్‌లో ఉంచగా, కొన్ని గంటల్లోనే ఫలితాలను ప్రకటించారు.